Поголемиот дел од семејствата со деца во ЕУ имаат едно дете, поточно 49 отсто од вкупниот број семејства со деца имаат едно дете, покажа анализата која вчера ја објави „Еуростат“.
Според податоците на официјалната европска статистика од 197 милиони домаќинства во ЕУ, нешто помалку од една четвртина имаат деца кои живеат со своите родители.
Од таа четвртина, 39 отсто се семејства со две деца, а 12 отсто имаат три или повеќе деца. Околу 13 отсто од домаќинствата со деца се самохрани родители, околу шест милиони од нив се домаќинства, што е три отсто од сите домаќинства.
„Еуростат“ ја анализираше и вработеноста на родителите во 24 земји-членки на ЕУ, а уделот на вработувањето со скратено работно време кај вработените жени постари од 25 и помлади од 54 години кои имаат деца бил поголем отколку кај жените без деца.
Меѓу овие земји, јазот бил најголем во централните и западните земји-членки на ЕУ, како што се Германија (34 проценти), Австрија (32,3) и Холандија (27,3). Помал јаз е забележан во источните земји-членки на ЕУ.
Од друга страна, учеството на вработувањето со скратено работно време кај вработените жени без деца било поголемо од учеството на жените со деца во Данска, Португалија и Латвија.
Додека некои земји-членки пријавиле помали разлики во вработеноста со скратено работно време меѓу жените со и без деца, жените со деца, според „Евростат“, имале значително пониски стапки на вработеност од оние без нив во повеќето земји.
