(ОБНОВЕНО)
Изјава на проф. д-р Дејан Докиќ:
Текстот е веројатно направен и пласиран со цел преку злоупотреба на моето име да се шири паника во јавноста и да се поткопа довербата на граѓаните во јавното здравство
„Ова дело го пријавив во полиција и претставува за мене кривично дело, и сметам дека институциите коишто се занимаваат со ова би требало да преземат мерки да ги објават оние коишто го направиле ваквото дело за да бидат пример и веќе да не се служат со ширење на паника, создавање една погрешна перцепција кај народот, во смисла на недоверба во функционирањето на јавното здравство“, изјави проф. Докиќ на заедничка прес конференција со Министерот за здравство, доц. д-р Венко Филипче
„Категорички ги демантирам наводите во тој текст и изјавувам дека јас не сум го напишал тој текст, нити пак стојам зад содржината. Овој текст е веројатно направен и пласиран со цел да преку злоупотреба на моето име се шири паника во јавноста и да се поткопа довербата на граѓаните во јавното здравство“, изјави проф. Докиќ на заедничка прес конференција со Министерот за здравство, доц. д-р Венко Филипче.
„Како што слушнавте претходно од министерот, пред се, има доволно сместувачки капацитет за сите оние на коишто им треба хоспитализација. Ги уверувам граѓаните дека ние ги лечиме според протоколи кои се преземени од западноевропските земји и од САД. Министерството направи напори да се набават сите лекови коишто се спомнати во тие протоколи, да набави опрема, концентратори, така што да нема ни едно легло без довод на кислород, преку концентратор или централен довод на кислород, имаме монитори, ЕКГ апарати и се она што е потребно за да ги лечиме. Впрочем и голем број на пациенти се излечени, кај нас во Ковид центарот на интерни клиники, според нашите статистички аналитички податоци, нашата смртност е околу 25% на 1200 лекувани пациенти, којшто споредено со западноевропските Ковид болници, смртноста кај нив изнесува од 22-30%. Како што гледате ние се наоѓаме токму во тој просек што го имаат и сите други високо развиени западноевропски земји во лекувањето на Ковид пациенти“, додаде проф. Докиќ.
„Ова дело го пријавив во полиција и претставува за мене кривично дело, и сметам дека институциите коишто се занимаваат со ова би требало да преземат мерки да ги објават оние коишто го направиле ваквото дело за да бидат пример и веќе да не се служат со ширење на паника, создавање една погрешна перцепција кај народот, во смисла на недоверба во функционирањето на јавното здравство, што сметам сепак и објективно го говорам ова, дека ние добро се справуваме со оваа криза“, истакна проф. д-р Докиќ на денешната средба со новинарите во дворот на Деканатот на Медицинскиот факултет во Скопје.
♦♦♦♦♦♦♦
Угледниот пулмолог проф. д-р Дејан Докиќ утрово демантираше дека тој е авторот на текстот што се споделува на социјалните мрежи и на Вибер, а кој се однесува на актуелната состојба со Ковид-19 во земјава, како и препораки околу тоа како да се справиме со пандемијата.
„Почитувани, денес видов дека на социјалната мрежа facebook се споделува текст кој наводно сум го напишал јас. Категорично ги демантирам наводите изнесени во тој текст и изјавувам дека јас не стојам зад истиот. Случајот кој е на штета на мојот углед и професионалност и има за цел да шири паника во јавноста, утрово го пријавив во полиција“, напиша проф. Докиќ на својот ФБ профил, и официјално демантирајќи дека стои зад постот кој стана вирален.
„По 30 часа поминати на работното место во ковид-центарот на клиниката, максимално изморен, уплашен и тажен од сѐ што се случува тука, чувствувам лекарска, но пред сѐ човечка одговорност да ја пренесам следната информација. Капацитетите во болниците се пополнети до максимум, ретко некаде се наоѓа по едно-две легла. Во приватните клиники е слична состојбата, и покрај тоа што таму се цените толку високи, што луѓето ставаат домови под хипотеки за да го спасат живот на најблиските. Вакцини нема, но и да беа порано дојдени немаше да имаме ефект од нив, зошто треба да поминат најмалку шест недели по нивното добивање за да се постигне имунитет. Вакцинираните се штитат самите себе, но можат да го пренесуваат вирусот на други! Овој бран е досега најголем и најтежок и буквално коси!!!“, се вели меѓу другото во „важното предупредување“.
Министерот за здравство д-р Венко Филипче и проф. д-р Дејан Докиќ, по повод овој случај, денеска во 13 часот ќе дадат изјава за медиумите во дворот на Деканатот на Медицинскиот факултет во Скопје.
