Се верува дека Делта варијантата на коронавирусот, која за прв пат беше идентификувана во Индија, е 60 отсто попренослива од варијантата Алфа, која претходно беше доминантна во Велика Британија, изјави водечкиот британски епидемиолог проф. Нил Фергусон.
Проф. Фергусон од Империјал колеџ во Лондон пред новинарите изјави дека проценките за преносливост се движат помеѓу 30 % и 100 %, но дека научниците сметаат дека 60 проценти е веројатно најдобрата проценка за поголемата преносливост на варијантата Делта во споредба со Алфа варијантата, пишува „Evening Standard“.
Тој рече дека следната зима, третиот бран на инфекции може да му парира на вториот бран на епидемијата во Велика Британија.
Засега, не е јасно како скокот на бројот на хоспитализирани лица ќе се одрази врз порастот на бројот на смртни случаи, со оглед на тоа што се потребни повеќе детали за тоа колку добро штитат вакцините против коронавирус од варијантата Делта.
„Сосема е можно да доживееме трет бран споредлив по бројот на хоспитализации“, рече Фергусон, додавајќи дека смета дека смртноста во тој случај веројатно ќе биде помала, со оглед на тоа што вакцините штитат.
Тој, сепак, забележува дека сето ова може да биде доста загрижувачки и дека има голема неизвесност.
