Девојчињата кои рано влегуваат во пубертет се изложени на поголем ризик од проблеми со менталното здравје во зрелоста, укажува нова американска студија во која учествувале повеќе од 7.800 девојчиња. Имено, се покажало дека депресијата и асоцијалното однесување се почести кај девојчињата кои првата менструација ја добиле на возраст од 7 до 10 години отколку кај девојчињата кои првата менструација ја добиле околу 12-годишна возраст.
Инаку, врската помеѓу раниот пубертет кај девојчињата и поголем ризик од неколку ментални проблеми во адолесценцијата, како што се депресија, анксиозност, нарушувања во исхраната и злоупотреба на дрога, е одамна позната.
Се смета дека неколку механизми се одговорни за овој ефект на раниот пубертет врз менталното здравје. Биолошки, раното производство на женскиот полов хормон естрадиол може да влијае на производството на рецепторите на серотонин, или пак хроничниот стрес може да предизвика ран пубертет. Социјално, децата кои изгледаат постари отколку што се, може да бидат третирани како такви од врсниците и возрасните, што исто така може да придонесе за стрес и симптоми на депресија.
Извор: Pediatrics
