Актерската легенда Роберт де Ниро ја изненади јавноста со информацијата дека на 79 години добил седмо дете. Веста толку многу ги изненади новинарите што плашејќи се дека погрешно го разбрале Де Ниро, побараа од неговиот агент потврда за оваа информација. Вистина, славниот актер навистина доби уште едно дете чие име и пол не сакаше да ги открие. А, ниту името на неговата мајка, иако се шпекулира дека станува збор за неговата помлада девојка, тренер за боречки вештини Тифани Чен. Двајцата беа фотографирани како се држат за раце во јули 2022 година, а во март оваа година таа изгледаше бремена додека излегуваа од ресторан во Санта Моника, Калифорнија.
Со поранешната сопруга Дијана Абот, Роберт има две деца, 51-годишната ќерка Дрена и 46-годишниот син Рафаел. Со поранешната девојка Туки Смит ги има 27-годишните близнаци Арон и Џулијан, а со Грејс Хајтауер ги има 25-годишниот син Елиот и 11-годишната ќерка Хелен.
Според спроведено истражување, просечната возраст на која мажите во светот за прв пат стануваат татковци е околу 25 години. Но, според повеќето државни статистики, од 1980 до 2014 година, бројот на мажи кои станале татковци на возраст од 35 или повеќе се зголемил за 58%. Во повеќето случаи, староста не е причина за загриженост. Повеќето од овие постари татковци немаат проблеми со плодноста и нивните деца немаат сериозни физички или развојни проблеми, вели д-р Роберт Е. Браниган, уролог и специјалист за машка плодност на Медицинскиот факултет Фајнберг на Универзитетот Нортвестерн. Сепак, тоа не значи дека одложувањето на татковството е целосно без ризик.
Стареењето е проблем при производството на сперма
Жените се раѓаат со сите јајце-клетки кои некогаш ќе им бидат потребни. Мажите, од друга страна, се буквално фабрики за сперма. Тие создаваат приближно 1.000 пливачи со секое отчукување на срцето, вели ендокринологот од Универзитетот во Вашингтон, д-р Бредли Анавалт. Повеќето од нив никогаш не оплодуваат јајце – клетка, тие се ослободуваат или за време на ејакулација или се распаѓаат во телото кога ќе помине нивното време. Откако ќе наполните 30 години, дел од вашата машинерија почнува да произведува „празни“, вели д-р Ранџит Рамасами, директор за машко репродуктивно здравје и хирургија на Медицинскиот факултет Милер во Мајами. За тоа можете да го обвините зрачењето, токсините од околината и стареењето.
Како што стареете и овие фактори почнуваат да се акумулираат, почнувате да ги губите Лајдиговите клетки – кои се наоѓаат во тестисите и произведуваат тестостерон – и Сертолиевите клетки, кои обезбедуваат поддршка, заштита и исхрана за време на развојот на спермата, истакнува д-р Браниган. Како резултат на тоа, вашето тело почнува да произведува повеќе неисправни сперматозоиди кои содржат генетски мутации кои би можеле да му наштетат на вашето идно дете. Просечен 30-годишен татко пренесува околу 55 мутации на своето потомство, според списанието Nature. Но, секоја година тој број се удвојува. Ова значи дека на секои 16 години бројот на мутации што ги пренесувате се удвојува. За 50 години – кога ќе имате 80 години – ќе оставите зад себе 8 пати повеќе генетски мутации.
