Приказните и митовите на постарите луѓе изобилуваат со теории за предвидување на полот во бременоста. Така, на пример, некои од нив велат дека носењето девојче ќе ви ја „украде“ убавината, ако е момче косата ќе ви порасне побрзо, девојчето ќе ве направи емотивни, а момчињата ќе ве направат агресивни.
Полот на детето е веќе одреден во моментот на зачнување, иако во првите недели од развојот момчињата и девојчињата се развиваат на идентичен начин. Расте мало испакнување, од кое подоцна се формира или пенис или клиторис.
Постојат многу различни теории за тоа како да се препознае дали бремената жена носи момче или девојче, но едно нешто што лекарите сигурно го знаат е дека во вториот и третиот триместар, жените бремени со девојчиња покажуваат повисоки нивоа на хормонот познат како мајчински серум HCG (MSHCG), хуман хорионичен гонадотропин – хормонот одговорен за втората линија на домашниот тест за бременост, отколку жените бремени со момчиња.
Новите истражувања сега сугерираат дека таквите хормонални разлики се појавуваат помалку од три недели по зачнувањето, наведува „Human Reproduction“.
Мачнината (hyperemesis gravidarum) е нешто почеста кај бременостите во кои жената носи девојче, што би можело да биде поврзано со повисокото ниво на HCG хормонот
Јувал Јарон од Институтот за генетика во медицинскиот центар „Сураски“ во Тел Авив и неговите колеги следеле 347 бремености постигнати преку ин витро оплодување. Истражувачите ги тестирале нивоата на HCG хормонот помеѓу 14 и 20 дена по оплодувањето и откриле некои разлики уште на 16-тиот ден.
По три недели, жените кои носеле девојчиња покажале ниво на хормонот за 18,5 отсто повисоко од оние кои носеле момчиња, без оглед на факторите како што се претходната бременост или возраста на мајката.
Понатаму, мачнината (hyperemesis gravidarum) е нешто почеста кај бременостите во кои жената носи девојче, што би можело да биде поврзано со повисокото ниво на HCG хормонот.
За време на бременоста, постојат многу други хормони кои влијаат на трудниците, без разлика на полот на фетусот. Многумина веруваат дека кога жените се бремени со девојче, нивото на естроген е повисоко, но оваа информација не е поддржана од повеќето студии. Всушност, нивото на естроген во текот на бременоста постојано се зголемува, без разлика на полот на фетусот, иако женските плодови покажуваат поголема концентрација на естроген во плодовата вода во почетокот на вториот триместар.
Тестостеронот во крвотокот на мајката следи слична шема, полека се зголемува за време на бременоста и не дава строга индикација за полот на детето.
Сепак, забележани се разлики во нивото на естроген во крвта на мајката. Во една скандинавска студија, нивото на естроген во првата половина од бременоста било околу 9 % повисоко кај трудниците со женско дете, а нивото на прогестерон било пониско во вториот триместар.
