Шугата кај децата е честа заразна кожна болест предизвикана од паразитот Sarcoptes scabiei, кој копа тунели под кожата и предизвикува интензивно чешање, осип и иритација. Децата се заразуваат преку директен контакт кожа на кожа со заразено дете или возрасен, преку споделување на облека, постелнина, играчки или предмети, во училишта, градинки и домови каде што децата се во блиска интеракција.
„Шугата е паразитска инфекција предизвикана од мал паразит, познат како Sarcoptes scabiei var hominis. Овој паразит продира во горниот слој на кожата, каде што се размножува, предизвикувајќи силен осип и неподносливо чешање. Но, шугата не е само непријатност – таа може да доведе до сериозни компликации како што се бактериски инфекции на кожата, сепса, па дури и заболувања на срцето и бубрезите“, објаснуваат од Институтот за јавно здравје на РСМ.
СИМПТОМИ
Симптомите на шугата може да се јават 4 до 6 недели по инфекцијата. Најчесто се манифестираат како силно чешање, кое е најинтензивно ноќе.
Најчеста локализација на промените се вдлабнатините (браздите) помеѓу прстите на рацете и нозете, свивките на лактите, предните набори на пазувите, папокот, половината и регионот на препоните. Грбот е ретко зафатен, а главата и тилот обично не се зафатени.
Децата се заразуваат преку директен контакт кожа на кожа со заразено дете или возрасен, преку споделување на облека, постелнина, играчки или предмети, во училишта, градинки и домови каде што децата се во блиска интеракција
Важни дијагностички знаци се скабиозните канали, на чиј крај може да се види црна точка. Исто така можат да се забележат и други кожни промени по телото, од типот на макули и папули. Во почетокот на болеста постојат скудни кожни промени, но пациентот е заразен за околината. Со развојот на алергијата, се засилува и јадежот.
Кај малите деца, осипот може да се јави и на дланките, стапалата и скалпот.
Кај лицата со послаб имунитет, особено кај хронично болните и лицата со ХИВ, може да се развие крустозна шуга. Ова е сериозна форма која предизвикува суви, лушпести области на кожата, со илјадници до милиони грини. Оваа форма е високозаразна и бара интензивен третман.
КОМПЛИКАЦИИ
Освен непријатноста од чешањето, шугата може да предизвика сериозни компликации. Долготрајното чешање и оштетувањето на кожата создаваат услови за бактериски инфекции, како импетиго, кои може да преминат во сепса – состојба опасна по живот. Во тропските области, шугата често е поврзана со акутни и хронични заболувања на бубрезите и срцето, како што се пост-стрептококен гломерулонефритис и ревматски срцеви заболувања.
ПРЕВЕНЦИЈА
Превенцијата е клучна. Еве ги најважните чекори:
- Избегнувајте контакт со заразени лица, особено ако имаат чешање или осип.
- Доколку некој од домаќинството има шуга, лекувајте ги сите членови на семејството, дури и ако немаат симптоми.
- Постелнината, облеката и предметите за лична употреба треба да се перат со топла вода и да се сушат на висока температура или на сонце.
- Чистењето на просториите со вакуум или миење е од помош, особено ако има заразени лица.
Шугата е предизвик кој бара будност, но и решителност. Со правилна едукација, навремено лекување и соработка, можеме да ја контролираме оваа болест и да го намалиме нејзиното влијание врз нашето општество, апелираат од ИЈЗ на РСМ.
