Научниците велат дека учениците растат повеќе за време на училишната година отколку во другите месеци од годината. Се верува дека рутината на училишните распореди им помага на децата да јадат и да спијат подобро.
Досегашните истражувања покажаа дека децата јадат повеќе брза храна и помалку играат за време на училишниот распуст и празници. Истражувачите од „Baylor College of Medicine“ во Тексас следеле повеќе од 3.500 деца во текот на пет години, од 2005 до 2010 година.
Истражувањето било спроведено на деца од 41 училиште. Медицинските сестри ја мереле нивната висина и тежина двапати годишно во септември и во април. Резултатите од нивните индекси на телесна маса (БМИ) биле запишани со цел да се открие како зголемувањето на растот се разликува кај децата со различни типови на тело.
Студијата е објавена во списанието „Frontiers in Physiology“, а резултатите покажале дека децата значително побрзо растеле во школскиот дел од годината во споредба со летните месеци. Сличен ефект бил забележан и за БМИ.
„Ова различно сезонско влијание врз висината и тежината доведува до поздрава физичка состојба на децата во текот на учебната година“, вели авторката на студијата, нутриционистката д-р Деби Томпсон.
Експертите велат дека се уште не им е целосно јасна причината за зголемениот раст во текот на учебната година. „Дополнителни истражувања за децата кои одат на училиште во текот на целата година би можеле да помогнат во одговорот на ова прашање“, додаваат истражувачите.
