Секое дете има право на безбедна и квалитетна здравствена заштита — од самиот почеток на животот. Сепак, новороденчињата и малите деца се соочуваат со поголеми ризици поради нивниот брз развој, променливите здравствени потреби и различните болести кои ги погодуваат. Тие се потпираат на возрасните кои треба да зборуваат во нивно име и да носат одлуки за нив. Дополнителен предизвик може да претставуваат и социо-економските околности, како што е ограничениот пристап до потребната грижа. Сите овие фактори ги прават поранливи ако здравствената заштита не е прилагодена на нивната возраст, големина, здравствена состојба и контекст, се вели на веб-страницата на Светската здравствена организација по повод Светскиот ден за безбедност на пациентите 2025.
Безбедноста на пациентите е основно човеково право и неопходен предуслов за квалитетна, достапна и доверлива здравствена услуга
Светскиот ден за безбедност на пациентите, кој се одбележува секоја година на 17 септември има за цел да ја подигне свеста за клучното значење на безбедноста во здравствената заштита. Овој ден ги охрабрува здравствените работници, институциите и заедницата да преземат конкретни мерки за спречување на медицински грешки, штети и ризици што можат да се појават при лекувањето. Истовремено, тој потсетува дека безбедноста на пациентите е основно човеково право и неопходен предуслов за квалитетна, достапна и доверлива здравствена услуга. Целта е да се зајакне довербата меѓу пациентите и здравствените системи, преку промовирање на култура на транспарентност, учење и континуирано подобрување.
Еден единствен безбедносен пропуст може да остави доживотни последици врз здравјето и развојот на детето. Затоа, Светскиот ден на безбедност на пациентите 2025 година е посветен на обезбедување безбедна здравствена заштита за секое новороденче и дете, со посебен фокус од раѓање до деветгодишна возраст. Годинешното мото „Безбедност на пациентите од самиот почеток!“ ја нагласува итната потреба од рано и континуирано дејствување за спречување на штети низ целото детство, што ќе придонесе за подобро здравје во текот на целиот живот.
Грижата за децата мора да биде прилагодена – на нивната возраст, тежина, развоен стадиум, здравствени потреби, способност за комуникација и конкретен животен контекст
СЗО упатува повик до родителите, старателите, здравствените работници, раководителите во здравството, едукаторите и заедниците да се обединат во акција за спречување на штета што може да се избегне во педијатриската грижа и за изградба на побезбедна и поздрава иднина за секое дете, како дел од глобалните напори за постигнување на Целта за одржлив развој број 3.
КЛУЧНИ ПОРАКИ ОД КАМПАЊАТА
⇒ Децата не се мали возрасни. Тие имаат потреба од индивидуализирана безбедна здравствена грижа. Грижата за децата мора да биде прилагодена – на нивната возраст, тежина, развоен стадиум, здравствени потреби, способност за комуникација и конкретен животен контекст.
⇒ Безбедноста на прво место – секогаш и во секоја здравствена установа. Децата се најизложени на ризик на интензивна нега и за време на сложени третмани. Затоа, нивната заштита од небезбедна грижа мора да биде приоритет.
⇒ Најчестите причини за штети се познати. Тие вклучуваат грешки со лекови и дијагноза, инфекции стекнати за време на лекување, проблеми со медицинска опрема (како цевчиња или монитори), како и пропуштени предупредувачки знаци кога здравствената состојба на детето се влошува.
⇒ Побезбедната грижа зависи од сигурни системи и тимска работа. Добро осмислени системи, поддржан здравствен кадар и активно вклучени старатели го гарантираат детското здравје. Секој глас е важен.
Светскиот ден за безбедност на пациентите е кампања за сите засегнати страни во здравствената заштита да работат заедно и да ја споделат ангажираноста за подобрување на безбедноста на пациентите
Децата не се „мали возрасни“
Децата не одлучуваат сами која медицинска установа ќе ја посетат или кој метод на лекување ќе го користат во случај на болест. Тие мора да се потпрат на грижата на своите родители и медицинскиот персонал кој обезбедува третман и нега. Во исто време, физичките и психолошките карактеристики на децата им забрануваат да бидат лекувани во установа која нема искуство во справувањето со деца. Децата ја доживуваат практиката или клиниката поинаку од возрасните пациенти и не се секогаш подготвени за потенцијално непријатни ситуации на лекување.
