Пејачката Марија Шерифовиќ на почетокот на декември стана мајка. Синот Марио го доби по пат на сурогат мајка. Луѓето се одлучуваат за сурогат мајчинство поради различни причини, како што се неплодност, здравствени компликации, истополови врски или ако се самци. Колку тоа воопшто чини?
„Просечната цена на сурогат мајчинството за оние кои живеат во САД е околу 100.000 долари“, вели Мери Џејн Карнахан, основач на заедница за застапување сурогат мајчинство. Според адвокатката за сурогат мајчинство, Амира Хасенбуш, вкупниот трошок „значително варира во зависност од многу различни фактори“, како што се локацијата, осигурувањето и дали идните родители користат агенција.
Постојат два вида на сурогат мајчинство: традиционално и гестациско. Гестацискиот родител не е биолошки поврзан со детето, туку само го носи плодот и го раѓа детето. За тоа добива надомест и нема никакви родителски права над детето. Традиционалната сурогат мајка дава сопствена јајце клетка и затоа се смета за еден од биолошките родители на детето. Традиционалното сурогат мајчинство е поретко поради правна и психолошка сложеност, но може да биде поевтино.
Секој од двата вида сурогат мајчинство бара посебни процедури, кои влијаат на вкупните трошоци. Вадењето јајце клетки и трансферот на ембриони се неопходни процедури за гестациските носители, но не и за традиционалното сурогат мајчинство. Од друга страна, традиционалното сурогат мајчинство може да бара дополнителни правни трошоци за договарање посвојување и старателство.
Анализа на типични трошоци за сурогат мајчинство
Многу процеси на сурогат мајчинство започнуваат со некоја форма на замрзнување на јајце-клетки или сперма, а потоа и ин витро оплодување (ИВФ). На некои семејства им требаат неколку циклуси пред да успеат да зачнат. Овие трошоци придонесуваат за вкупната цена.
Тестови и третмани за плодност
Сурогат мајчинството често започнува со серија тестови за плодност за планираните родители и здравствени прегледи за сурогат мајката. Овие трошоци се движат од 4.000 до 7.000 долари.
Создавање ембрион
Во сурогат мајчинството, јајце клетките може да се оплодуваат со споменатата ИВФ метода или со интраутерина инсеминација (ИУИ). Генерално, ИУИ е значително поевтино од ИВФ. Еден круг ИУИ чини од 500 до 4.000 долари, додека ИВФ може да чини до 20.000 долари.
Донирање на јајце клетки
Гестациското сурогат мајчинство бара ин витро оплодување. Ако родителите треба да платат и за донација на јајце клетки, тоа може да чини и повеќе од 7.000 долари. Згора на тоа, понекогаш треба да се плати надомест за складирање на јајце клетките додека тие не се искористат. Тоа чини околу 500 долари годишно.
Надомест за сурогат мајка и осигурување
Надоместоците за сурогат мајчинство може да се движат од бесплатни (ако е пријател или член на семејството) до скапоцени, над 50.000 долари за искусен сурогат. Според искуството на адвокатот Хасенбуш, сурогат мајките од западниот брег на САД имаат тенденција да добиваат повисок надомест од оние на југ или среден запад. Од родителите, исто така, може да се бара да платат премии за осигурување на сурогат мајка, кои може да се движат од 500 до 1.000 долари месечно.
Агенциски такси
Агенциите за сурогат мајчинство нудат различни услуги. Тие ги поврзуваат сурогат мајките со родителите, нудат скрининг услуги за да се осигураат дека двете страни се ментално, физички и емоционално подготвени за процесот и ја координираат логистиката помеѓу медицинските експерти и адвокатите. Иако не е нужно да се соработува со агенција, тие кои на тоа ќе се одлучат ќе треба да одвојат меѓу 15.000 и 30.000 долари.
Правни надоместоци
Адвокатите составуваат договор за сурогат мајчинство во кој се наведени обврските на секоја страна. На пример, договорот може да ги обврзе потенцијалните родители да и ги надоместат трошоците за породилната облека на сурогат мајката или да бара сурогат мајката да се воздржи од пушење и пиење алкохол за време на бременоста. Адвокатите организираат и законско старателство. Адвокатските трошоци варираат во зависност од видот на договорот, но обично се движат од 6.000 до 10.000 долари.
Породување
Просечниот трошок за породување во болница во САД е околу 14.000 долари. Доколку сурогат мајката има здравствено осигурување, најголемиот дел од трошоците се покриени. Ако нема осигурување, родителите можат да платат краткорочна полиса.
Останати трошоци
Постојат и други фактори кои треба да се земат предвид. Цената на сурогат мајчинството се зголемува ако станува збор за близнаци или тројки, ако сурогат мајката се породи со царски рез, ако треба да се плати хоспитализација за сурогат мајката или новороденчето, но и ако новороденчето треба да патува во друга земја. или ако постојат постпородилни компликации.
