За време на бременоста важно е да се работи на превенција на вагиналните инфекции што се постигнува со одржување на здрава вагинална флора. Се препорачува одговорно полово однесување, правилни прехранбени навики, зголемено користење на орални и вагинални пробиотици, како и добра интимна хигиена.
КЛАМИДИЈА
Chlamydia trachomatis е бактерија која се пренесува по полов пат и најчесто е асимптоматска. Инфекцијата со оваа бактерија за време на бременоста и породувањето може да доведе до инфекции кај плодот и неговата обвивка, како и до предвремено прскање на водењакот и предвремено породување. Секое трето дете од инфицирана мајка со минувањето низ родилниот канал ќе добијат конјуктивитис, а секое шесто ќе се соочи со воспаление на белите дробови. Оваа бактерија се открива со земање на брис од грлото на матката, а се лекува со антибиотици, и потребно е да се лекуваат двајцата партнери.
ГЕНИТАЛЕН ХЕРПЕС
Гениталниот херпес го имаат два проценти од бремените жени. Почесто се јавува во бременоста поради имунолошките промени во организмот на трудницата. Најчесто е предизвикан од херпес симплекс вирусот тип 2, поретко од херпес симплекс тип 1. Се пренесува со контакт, а плодот може да се инфицира за време на бременоста, за време на породувањето и по породувањето. Клиничката слика на инфицираното дете варира од локални симптоми (инфекција на кожата, окото и устата), до ментални ретардација, епилепсија, воспаление на средишниот нервен систем или целиот организам со трајни последици. Може да се појави за прв пат во бременоста или да се повтори од претходно. Се лекува со антивирусни лекови.
ХПВ
Инфекцијата со хуман папилома вирус (ХПВ) во бременоста нема да влијае на здравјето на вашето дете, а не се забележани ни случаи на пренос на овој вирус за време на породувањето.
ТРИХОМОНИЈАЗА
Trichomonas vaginalis е паразит кој исто така може да предизвика предвремено породување. Водечки симптом на инфекцијата е исцедок кој е жолто-зелен, пенлив и со непријатен мирис. Инфекцијата се пренесува по полов пат, се лекува со антибиотици и тоа задолжително двата партнера.
Доколку постојат клинички манифестации, многу е важно да се препознаат и да се лекуваат на време. Ако планирате бременост, се советува гинеколошки преглед и евентуално лекување на инфекцијата пред бременоста за да се избегнат бројни компликации кои може да се јават во бременоста и за време на породувањето.
