Повеќето луѓе сакаат да направат добро дело, позитивна разлика во животот на другите – луѓе кои не ги познаваат, луѓе кои можеби и никогаш нема да ги сретнат, но луѓе кои во даден момент можеби ќе имаат есенцијална потреба да преживеат. Дарувањето крв е неверојатно моќен чин со кој покажувате високо ниво на свесност и хуманост преку едноставен, безбеден и ефикасен начин кој ја прави најголемата разлика: Вашата крв спасува живот.
Зарем има повозвишено чувство од сознанието дека можеби токму Вие ќе го спасите животот на некоја жена која страда од компликации при породување, ќе одржи во живот дете со тешка анемија, ќе му помогне на пациент кој мора итно да биде опериран или можеби ќе биде поддршка за време на јавно-здравствена криза… Оттаму – крводарителските акции се повеќе од потребни, а крводарителите заслужуваат највисоко признание.
„Како лекари педијатри секојдневно се соочуваме со тешки случаи во кои има потреба од крв и крвни деривати, па оттука произлегува и потребата да помогнеме, а истовремено и да испратиме порака за хуманост и подигнување на свесноста за дарување крв“, вели проф. д-р Соња Бојаџиева, раководителка на Катедрата за педијатрија при Медицинскиот факултет
Во таа насока за поздравување е иницијатива на новата раководителка на Катедрата за педијатрија при Медицинскиот факултет во Скопје, проф. д-р Соња Бојаџиева, која во соработка со Универзитетската клиника за Детски болести утре, 7 јули (среда), од 9 до 14 часот, во просториите на Катедрата за педијатрија, организира крводарителска акција. Специфичноста на оваа акција е во тоа што главните дарители на крв се токму здравствените работници, докторите, кои се грижат за здравјето на најмалите. Несебичен чин на хуманост и висока свесност!
„Како лекари педијатри секојдневно се соочуваме со тешки случаи во кои има потреба од крв и крвни деривати, па оттука произлегува и потребата да помогнеме, а истовремено и да испратиме порака за хуманост и подигнување на свесноста за дарувањето крв“, вели проф. д-р Соња Бојаџиева, раководителка на Катедрата за педијатрија.
Како што вели проф. Бојаџиева, дарувањето крв е моќен чин со кој испраќате порака за хуманост, високо ниво на свесност и солидарност. А токму солидарноста е она што ни недостига. Да се биде човек, да се помогне, да се спаси нечиј живот – имено една доза дарувана крв може да спаси дури три човечки животи. Навистина – „Вашите капки крв можат да создадат океан на среќа“.
И не случајно Светската здравствена организација ги прогласи дарителите на крв за херои, осврнувајќи се на изреката:
„Кој ќе спаси еден живот, како да го спасил целото човештво!“
