Лубеницата неодамна доби епитет на намирница со неограничени можности за кулинарска обработка, иако некогаш се сметала само за сочен деликатес со мала хранлива вредност. Ова незаменливо летно овошје совршено се вклопува во разни салати, смуди и сорбети, збогатувајќи ги со својата сладост и боја.
Но, дали знаевте дека јадењето лубеница за време на бременоста има уште поголеми здравствени придобивки? Поради високата содржина на вода, лубеницата помага во намалување на жиговината. Исто така, овошните шеќери присутни во лубеницата помагаат во ублажување на утринските мачнини и дехидрацијата, а минералите можат да помогнат во спречувањето на можна појава на мускулни грчеви во третиот триместар.
Го намалува ризикот од прееклампсија
Во споредба со доматите, лубеницата е побогата со ликопен, антиоксидант кој штити од развој на рак и кардиоваскуларни заболувања, го поддржува имунолошкиот систем и претставува природна внатрешна заштита на кожата од штетните УВ зраци.
Уште подобри вести за придобивките од јадењето лубеница за време на бременоста доаѓаат од студија објавена во списанието International Journal of Gynecology and Obstetrics, чии резултати покажуваат дека земањето ликопен во форма на додатоци во исхраната го намалува ризикот од прееклампсија за 50%.
Научниците откриле и дека лубеницата содржи хранливи материи како што се витамини А, Ц и Б6, како и калиум и магнезиум, кои се важни за видот на бебето, развојот на нервниот и имунолошкиот систем. Освен за бебето, калиумот е важен и за самата бремена жена бидејќи го регулира балансот на водата во крвта и ткивата.
Со своите бројни придобивки и сочен освежителен вкус, лубеницата може да се смета за една од најсовршените летни намирници. Патем, дали знаевте дека една чаша лубеница содржи само 50 калории?
