Потресите на мозокот претставуваат повреда што се случува кога силен удар во главата предизвикува истегнување на нервните клетки во мозокот. Овие повреди годишно испраќаат повеќе од еден милион деца во САД во итните служби или во ординациите на лекарите. Важно е да се препознаат симптомите на потрес на мозокот навреме за да се побара лекарска помош, што може да го подобри закрепнувањето, објаснува проф. д-р Кристина Л. Мастер, специјалист за педијатриска спортска медицина и општ педијатар во Детската болница во Филаделфија, професорка по клиничка педијатрија на Медицинскиот факултет „Перелман“ при Универзитетот во Пенсилванија.
Проблемите со видот што може да се појават кај децата по потрес на мозокот вклучуваат: заматен вид, двоен вид, потешкотии при читање, напрегање на очите или болка, тешкотии при фокусирање на блиска оддалеченост
Веројатно сте запознаени со вообичаените симптоми на потрес на мозокот, како што се главоболка, вртоглавица и проблеми со рамнотежата. Сепак, многу родители не се свесни дека проблемите со видот исто така често се јавуваат по потрес на мозокот. Всушност, повеќето деца со потрес на мозокот ќе имаат симптоми поврзани со видот. Еве на што треба да внимавате и како да му помогнете на вашето дете да добие соодветна грижа додека закрепнува.
Какви симптоми поврзани со видот може да се појават по потрес на мозокот?
Проблемите со видот што може да се појават кај децата по потрес на мозокот вклучуваат:
- заматен вид,
- двоен вид,
- потешкотии при читање,
- напрегање на очите или болка,
- тешкотии при фокусирање на блиска оддалеченост.
Имајќи предвид дека читањето и другите визуелни активности се неизбежен дел од наставата, овие симптоми може значително да влијаат на враќањето на детето во училиште. Препознавањето на проблемите со видот по потресот на мозокот е важен прв чекор во прилагодувањето на училишните обврски за полесно враќање во наставата.
Како се утврдуваат проблемите со видот по потрес на мозокот?
Лекарот ќе постави конкретни прашања за проблемите со видот што вашето дете може да ги има и ќе направи физички преглед за да ја процени подвижноста на очите. Може да побара од детето да следи подвижен предмет со погледот или да гледа наизменично помеѓу различни точки за да види дали тоа предизвикува симптоми како главоболка, вртоглавица или замор на очите. Лекарот може исто така да му наложи на детето да ја движи главата додека се обидува да се фокусира на неподвижен предмет, бидејќи проблемите со видот може да бидат поврзани со зголемена чувствителност на движење. На крај, може да го тестира фокусирањето на детето на предмет што се движи од далеку кон блиску, со двете очи заедно и со секое око поединечно.
Најчесто, проблемите со видот исчезнуваат сами од себе во рок од неколку недели. Меѓутоа, кај некои деца тие можат да траат подолго од еден месец. Во такви случаи, препорачливо е да се побара специјалист кој има искуство во лекување на проблеми со видот поврзани со потрес на мозокот
Како да се управува со проблемите со видот во училиште по потрес на мозокот?
Раното откривање на проблемите со видот овозможува полесно приспособување на училишните обврски. При враќањето во училиштето, вашето дете може да има потреба од привремена поддршка, како што се:
- редовни визуелни паузи за да се спречи замор на очите,
- поголем фонт при читање за полесно фокусирање,
- однапред испечатени белешки за да се ограничи потребата за постојано прилагодување на фокусот од далеку на блиску и обратно,
- приоритетно место за седење за полесно гледање на материјалот што го презентира наставникот.
Колку долго траат проблемите со видот по потрес на мозокот?
Најчесто, проблемите со видот исчезнуваат сами од себе во рок од неколку недели. Меѓутоа, кај некои деца тие можат да траат подолго од еден месец. Во такви случаи, препорачливо е да се побара специјалист кој има искуство во лекување на проблеми со видот поврзани со потрес на мозокот.
Здравствените професионалци кои се специјализирани за овие проблеми може да се разликуваат во зависност од местото на живеење, но вообичаено вклучуваат лекари по спортска медицина, офталмолози, специјалисти за рехабилитација или дури и оториноларинголози (специјалисти за уво, нос и грло), бидејќи проблемите со видот можат да бидат поврзани со вестибуларни проблеми, како што се нарушена рамнотежа или чувствителност на движење.
Запомнете
Ако сметате дека вашето дете има потрес на мозокот, задолжително разговарајте со неговиот педијатар за евентуални проблеми со видот и како да се справите со нив за време на закрепнувањето, советува проф. д-р Кристина Л. Мастер, специјалист за педијатриска спортска медицина и општ педијатар во Детската болница во Филаделфија, професорка по клиничка педијатрија на Медицинскиот факултет „Перелман“ при Универзитетот во Пенсилванија. (ААП)
