Способноста за пренесување на индиската варијанта на коронавирус B.1.617.2 можеби е помала отколку што се веруваше досега, вели Нил Фергусон, еден од водечките британски епидемиолози, истовремено додавајќи дека постоечките вакцини против коронавирус би можеле да бидат помалку ефикасни во борбата против споменатата варијанта.
Британскиот премиер Борис Џонсон неодамна изјави дека појавата на индиската варијанта може да го попречи неговиот план за целосно укинување на „заклучувањето“ во Англија на 21 јуни.
Според зборовите на премиерот, ако варијантата е незначително попренослива од кентската варијанта, тогаш попуштањето на мерките би можело да оди по планот, но ако индиската варијанта има значително поголем капацитет за пренос, тогаш Џонсон би бил принуден да го преиспита најавениот план за отворање на земјата.
Епидемиологот Нил Фергусон, од Imperial College во Лондон, вели дека сè уште постои трошка надеж. „Иако изгледа дека индиската варијанта има значителна предност во растот, според најновите податоци, се чини дека е помала отколку што досега се веруваше, рече Фергусон.
Со цел да се утврди степенот до кој оваа варијанта ја надминува кентската варијанта, потребно е да се почекаат сеопфатни податоци, објасни епидемиологот.
Фергусон додава дека владата верува дека вакцините штитат од тешки форми на болеста предизвикана од варијантата B.1. 617.2, но исто така и дека оваа варијанта полесно се шири кај вакцинираните лица, т.е. ефикасноста на вакцината во смисла на пренесување на варијантата е „намалена“.
