Канадската олимпијка и кошаркарска ѕвезда Ким Гошер пред две недели сподели очајна молба да и биде дозволено да го однесе своето тримесечно бебе на Олимписките игри во Токио. Јавниот апел вроди со плод овие денови, а организацискиот одбор на Летните олимписки игри објави дека се ублажени ограничувањата за да им се дозволи на мајките кои дојат да ги понесат и своите деца со себе.
Конечно пристигна добра вест за сите мајки, професионални спортистки, а организацискиот одбор испрати силна порака до светот: Да, жените можат да бидат и мајки и професионални спортистки!
„Инспиративно е што толку многу спортисти со мали деца се во можност да продолжат да се натпреваруваат на највисоко ниво, вклучително и Олимписките и Параолимписките игри, а ние сме посветени да сториме се што е можно за да им се овозможи да настапат на игрите во Токио 2020“, пренесува „Вашингтон пост“. „Откако внимателно ја разгледавме уникатната ситуација со која се соочуваат спортистките со деца, со задоволство потврдуваме дека, кога е потребно, децата ќе можат да ги придружуваат своите родители во Јапонија“, порачаа тие.
Новата политика охрабри неколку спортистки кои се квалификуваа за Токио, вклучувајќи ја и американската маратонка Алифин Тулиамук, чија ќерка Зои е родена во јануари, канадската кошаркарка Ким Гошер, чија ќерка Софи е родена во март, и американската фудбалерка Алекс Морган, чија ќерка Чарли е родена во мај 2020 година.
Летните олимписки игри започнуваат на 23 јули и ќе траат до 8 август
„Сè што некогаш сакав беше да ја претставувам Канада на Олимписките игри, а оваа година се квалификувавме. Но, поради пандемијата и строгите правила, сега сум во дилема“, рече Гошер на видеото на Инстаграм минатата недела пред да одлучи дали да оди во Токио без ќерката Софи. „Во моментов, јас сум принудена да одлучам дали сум мајка која дои или олимписка атлетичарка. Очигледно не можам да бидам и двете“, заклучи таа.
Атлетичарката Алифин Тулиамук, мајка на петмесечното девојче Зои, која сè уште го дои, имала сличен проблем. Таа за „Вашингтон пост“ изјави: „Не можам да замислам дека не е со мене, јас сè уште ја дојам. Побарав изземање“. Да потсетиме, Тулиамук напиша во објава на Инстаграм во неделата, пред да се ублажат ограничувањата: „Знам дека ќе ја оставам само 10 дена, и таа ќе биде добро, и дека и многу други мајки го направиле истото, но сепак јас се уште ја дојам“.
Но, оваа недела, конечно пристигна добра вест за сите мајки, професионални спортистки, а организацискиот одбор испрати силна порака до светот: „Да, жените можат да бидат и мајки и професионални спортистки.“
За потсетување, Летните олимписки игри започнуваат на 23 јули и ќе траат до 8 август.
