Во чест на сите деца кои се борат со малигни заболувања, Универзитетската клиника за детски болести, заедно со волонтерите од невладината организација САНО, утре претпладне (19 септември, 11 часот) организираат настан на Градскиот плоштад во Скопје.
На настанот, коj е насловен „Убаво е да си херој!“, ќе бидат пуштени 500 златни балони, во знак на поддршка и подигнување на свеста за карциномот кај децата и адолесцентите и проблемите со кои се соочуваат со цел јавноста подобро да ја разбере болеста и да ги ослободи децата од предрасуди.
„Златен септември“ е месец кога треба да се зборува за малигните заболувања кај децата, да се подигне свеста за сите аспекти на оваа борба и за време на престојот во болницата и по враќањето во домашната средина по лекувањето.
„Златната боја е боја на силата, храброста и упорноста, и е симболична боја за нашите мали, големи херои. Ракот во детството остава длабоки и трајни последици врз растот и развојот на децата, како и врз целото семејство и за жал, оваа малигна болест ги погодува децата од сите возрасти. Борбата низ која поминуваат децата, како и нивните семејства е болна, тешка и долга и честопати по лекувањето има бројни последици од третманот со кои треба да се справат“, велат од Детската клиника на својот ФБ профил.
„Златен септември“ е глобална кампања, а златната лента е симбол за поддршка на децата болни од рак и нивните родители. „Затоа гордо донесете златна лента на вашата блуза и на тој начин дајте им поддршка на децата и нивните родители“, додаваат од Клиниката.
