Повеќето бебиња сакаат да се капат, и родителите колку и да внимаваат додека тие мафтаат со рачињата секогаш им се мократ и ушињата. Што ако на бебето му влезе вода во уши? Како да го решите и може ли да се јави проблем поради тоа?
Кај доенчиња до 4-5 месеци може да се контролира миењето на косата, така што е невозможно поголема количина на вода да влезе во ушите.
Доколку со рачињата, бебето го навлажни подрачјето на увото, тоа нема да создаде проблем. Важно е главата да се испира со полевење, во зафрлен став, така да се внимава да не влегува вода во увото. Потоа, со мек пешкир се брише ушната школка и со ставање на главата настрана се отстранува евентуалниот вишок вода.
Треба да се избегнува ставање на предмети во увото (како стапчиња за уши), оти и мала повреда е доволна за влез на микроорганизми. Не претерувајте ниту со шампон, оти со одмастување на кожата се намалува и pH вредноста на кожата и нејзината природна заштита, и таа станува почувствителна на инфекции.
