Царскиот рез спаѓа во групата операции од класичната абдоминална хирургија, која ги носи сите ризици за компликации и за смртност, како и за секоја абдоминална операција. Загубата на крв и крвавењата при породување со царски рез се поголеми, а со тоа постои опасност од анемија и намалување на општата отпорност кај породената жена и побавно заздравување. Постои зголемена опасност од инфекции, гноење на раната и нарушување на перисталтиката (работа на цревата), што може да наложи потреба за повторна хируршка интервенција. Ендометриите или воспаленијата на ендометриумот се почести при породувања со царски рез.
Заздравувањето на раната по царски рез и сензациите што се чувствуваат се подолготрајни и може да траат со недели. Исто така, тромбоемболиските нарушувања што се јавуваат поради отежната венска циркулација се многу сериозна компликација и се почести по породување со царски рез.
Симптомите се тромбоза, јака болка и оток на долните екстремитети и може да се јави и тромбемболија или белодробна емболија. Затоа брзата мобилизација и движењето по породување е од витално значење за породената жена.
Заздравувањето на раната доколку немало компликации и немало инфекција обично оди брзо – за четири до шест недели. Трпнењата во стомакот и околу раната може да траат подолго време и може да се резултат на создавањето келоид од зараснувањето на раната. Менструалниот циклус, доколку доите може да отсуствава и подолго време – со месеци, но тоа не значи дека не можете повторно да забремените.
