Се наоѓаме на сред сезона на вирози, настинки, грип, а на нив посебно се изложени децата кои се во колективи. Повеќето родители кога ќе им се разболи детето, се обидуваат ден-два да го лекуваат дома, со овошје, чаеви и слично, а доколку состојбата не се подобри, тогаш одат на лекар.
Во некои случаи потребни се антибиотици, за да на детето му биде подобро, медицинските експерти од Британската национална здравствена служба им откриваат на родителите три работи кои се важни доколку лекаро му препише вакви лекови на детето.
- Антибиотикот секогаш се пие до крај
Од Британската национална здравствена служба (NHS) објаснуваат дека кога на детето ќе му се препише антибиотик, важно е секогаш да се испие до крај – дури и ако на детето му е подобро само по два или три дена.
„Доколку на детето му биле препишани антибиотици за бактериска инфекција, можеби ќе ви се чини дека е подобро по два или три дена. Но, важно е овие лекови секогаш да се испијат до крај“, велат од NHS, наведувајќи дека во спротивно ризикот инфекцијата повторно да се појави е поголем.
„Непиењето на антибиотиците до крај, исто така, го зголемува и ризикот бактериите да станат отпорни на антибиотици“, додаваат тие.
- Почитувајте го советот на лекарот за потребата од антибиотици
„На децата често не им се потребни антибиотици бидејќи во повеќето случаи инфекциите кај децата се предизвикани од вируси, како настинка или грип, кои антибиотиците не можат да ги излечат“.
Кога станува збор за овие лекови, од британската здравствена служба ги советуваат родителите да го послушаат советот што ќе им го даде педијатарот за тоа кога антибиотици се навистина потребни, а кога не се.
- Антибиотиците не се лек за се
Британската национална здравствена служба објаснува дека антибиотиците не помагаат при сите инфекции, вклучувајќи ги и повеќето видови кашлица, настинка и грип.
Тие истакнуваат и дека антибиотиците повеќе не се препишуваат рутински при воспаление на грлото или инфекции на увото кај децата и дека советот е да се обидат да се излечат поблаги бактериски инфекции, како кај возрасните така и кај децата, без антибиотици и дека во овие случаи тие ретко се препишуваат.
„Колку повеќе антибиотици се користат за лекување на некои безопасни состојби, толку се поголеми шансите тие да станат неефикасни во лекувањето на некои посериозни состојби“, истакнуваат експертите.
Светската здравствена организација и другите глобални здравствени организации се стремат да ја намалат употребата на антибиотици, особено за несериозни медицински состојби.
