Денес, одредени видови храна и пијалаци станаа основни намирници, детски ужини и меѓуоброци без кои не можеме. На пример, сок од јаболко, разни крекери како здрави грицки и слично. Сето тоа изгледа како совршено здрава опција, но кога ќе ја прочитате листата на состојки и ќе направите многу едноставна математика, сосема е јасно дека многу од омилените ужини на децата не се толку здрави како што изгледаат.
Дефинитивно најпопуларните „замаскирани престапници“ се:
- Чоколадни намази
Секако, сите деца сакаат намази со чоколадо и лешник, но двете основни состојки се шеќерот и маслото. Всушност, една порција содржи 21 грам шеќер (што е повеќе од пет лажички додаден шеќер – блиску до она што Американското здружение за срце го препорачува како дневна доза шеќер!).
Но, не е тешко да се разбере зошто многу родители се наивни кога се во прашање чоколадните намази. Токму тие долго време се маркетиншки позиционирани како здрав појадок; намачкани на парче интегрален леб и задолжително сервирани со чаша млеко.
- Овошни закуски
Овошните грицки некако поминуваат како поздрава верзија на бонбони, иако листата на состојки е речиси иста како гумените бонбони. Една мала порција од овие овошни закуски има неколку лажички додаден шеќер. И немојте да бидете измамени со етикети на кои пишува „од вистинско овошје“, бидејќи тоа е всушност овошен концентрат, кој во основа е форма на шеќер.
- Сокови
Има причина зошто Американската академија за педијатрија препорачува ограничување на внесот на сокови за децата и поттикнува децата да ги добиваат своите овошни оброци од вистинско овошје. Овошниот сок, дури и кога е означен како „100 проценти сок“, е концентриран извор на калории и природен шеќер.
Соковите се слатки и затоа претерано се консумираат, а премногу сок може да го ослабне апетитот, но и да доведе до дијареа и зголемување на телесната тежина.
- Крекери
Различни крекери редовно се служат во многу градинки и училишта, и иако многу од нив се етикетирани како здрави крекери од интегрално брашно, тие всушност се повеќе како колачиња. Најчесто се прават со рафинирано брашно и секако со додадени засладувачи. Секој крекер има околу една лажичка шеќер. Сепак, некои крекери содржат калциум и мала количина на железо, но попаметно би било овие минерали да се добијат од похранлива храна.
