“Без оглед на кого наликувате во младоста, во триесеттите, ќерките се повеќе личат на мајката, а синот се претвора во својот татко“, вели една стара поговорка, а да видиме што велат најновите истражувања.
Значи, и науката покажала дека има некои работи кои девојчињата најчесто ги наследуваат од своите мајки, а не се поврзани со изгледот.
Интелигенција
Шансите да го наследите “паметот на мама“ се значително поголеми отколку да сте го наследиле од таткото.
Во студија спроведена во Глазгов, во која учествувале 12.000 млади луѓе на возраст од 14 до 22 години, мнозинството од испитаниците имале ист или максимум 15 поени повисок или помал коефициент на интелигенција од нивните мајки.
Менопауза
Голема е шансата жените да влезат во менопауза на иста возраст како и нивните мајки. Истражување спроведено во 2011 година на Британскиот институт за истражување на ракот, во кое учествувале повеќе од 2.000 жени, покажало дека предвремената или доцната менопауза, односно онаа што се јавува пред 45-тата и по 55-тата година, може да биде генетски условена.
Навики за спиење
Не спиете добро? Можеби и за несоницата е виновна вашата мајка. Во стручното списание Sleep Medicine е објавено истражување кое тврди дека мајките често ги пренесуваат своите навики за спиење на своите деца, така што потомците на жените кои страдаат од несоница спијат помалку од нивните врсници. Научниците не воочиле такви наследни особини од татковците.
Младоликост
Ако мајката изгледа младолико, тогаш женските деца имаат голема среќа бидејќи многу е поголема веројатноста да изгледаат така на нејзина возраст. Од Институтот за биологијата на стареење Макс Планк во Германија, докажале дека ДНК од митохондриите, што ја наследуваме директно од нашите мајки, може делумно да го контролира и начинот на кој старееме.
