Да се биде родител значи да се биде многу повеќе од обичен старател. Вашата улога во животот на детето е клучна за градење доверба, чувство на сигурност и самодоверба. Но, што се случува кога децата ќе пораснат и ќе го напуштат семејниот дом?
Многу млади луѓе се соочуваат со потешкотии во балансирањето на обврските и одговорностите на почетокот од самостојниот живот, но тоа не мора да биде така. Вие можете да ги подготвите за успех уште додека живеат со вас. Стручњаци за семејни односи ги издвојуваат клучните работи што децата треба да ги видат кај своите родители за да израснат во самостојни и успешни личности.
Финансиска писменост
„На децата им се потребни родители кои ќе ги научат како да се однесуваат со парите. Вештините за управување со финансии не се вродени – ниту кај нас, ниту кај нашите деца. Затоа е исклучително важно, меѓу сите животни вештини што им ги пренесуваме, финансиската писменост да биде висок приоритет. Ако не сакате да воспитате разгалено и неодговорно дете кое ќе израсне во финансиски недисциплинирана млада личност – започнете го ‘тој разговор’ уште денес“, советуваат The Money Couple, тренери за лични финансии.
Јасни и цврсти граници
„Родителите често попуштаат со границите затоа што сакаат да бидат пријатели, наместо родители. Поставуваат правило: ‘Денес во продавница нема слатки.’ Детето прво е мирно, а потоа почнува со молење, па со плачење и испади. На крајот, родителите попуштаат – и тоа е грешка. Децата се чувствуваат сигурно кога границите се јасни и непроменливи. Научете ги да ги почитуваат правилата во малите работи и ќе си заштедите многу маки во тинејџерските години. Кога децата му веруваат на зборот на родителот, сите добиваат“, објаснува д-р Роберта Шејлер, експертка за односи и семејно советување.
Автентичност како личен пример
„На децата им е потребна слобода да го изразат своето вистинско ‘јас’ и притоа да се чувствуваат прифатени и поддржани. Тоа можете да им го покажете со сопствен пример – така што ќе бидете тоа што сте и ќе ѝ дозволите на вашата личност да блесне. Поттикнувањето на детето да ги развива своите природни таленти и да се изразува автентично ја зајакнува неговата самодоверба и чувството на лична вредност. Кога детето расте во средина каде што е сакано и прифатено такво какво што е, израснува во зрела и стабилна личност“, вели Џеки ван дер Велде, сертифицирана хипнотерапевтка и советничка за здравје и благосостојба.
Животни вредности
„Сè што им е потребно на децата од родителите се алатки со кои ќе станат корисни и одговорни членови на општеството. Родителството мора да биде со намера и со цел. Крајната цел е да ѝ се понуди на заедницата личност што делува водена од силен морален компас“, истакнува Филис Хелен, тренер и авторка на детски книги.
