Постојат неколку добро познати работи кои се случуваат за време на породувањето – како трудови и болки. Но, може да се случат и други работи кои може да ве изненадат. Некои се вообичаени и безопасни, додека за некои итно треба ангажман на стручен персонал.
Ненамерно празнење на цревата
Со оглед дека за време на породувањето се користат истите мускули кои се користат за голема нужда, може да се случи да дојде до ненамерно празнење на цревата – и тоа е во ред.
“Вообичаено е тоа да се случи, тоа всушност значи дека правилните мускули се користат за детето да се потисне надовр“, вели д-р Нита Ландри.
Епидуралната анестезија, која го утрнува долниот дел од телото, може да ја зголеми веројатноста за неконтролирано празнење на цревата, објаснува докторката и вели дека ако пациентката почувствува порив, не треба да се срами.
Мачнина и повраќање
Се покажало дека мачнината и повраќањето не се само дел од “утринските мачнини“, туку може да се јават и за време на породувањето, особено во текот на активната фаза од породувањето кога детето се истиснува нанадвор.
“Кога жената ќе добие епидурална, може да дојде до пад на крвниот притисок што може да предизвика повраќање“, вели д-р Шери Рос.
Продолжено породување
“Првата фаза од породувањето вклучува латентна фаза (рано породување), активна фаза и преодна фаза. Но, понекогаш тие фази не се одвиваат така брзо како што биј требало. Продолжена латентна фаза е кога породувањето трае повеќе од 20 часа за мајки кои прв пат раѓаат и над 14 часа за оние на кои ова не им е прво породување“, објаснува д-р Лондри.
Таа вели дека долготрајното латентно породување може да биде исцрпувачко и понекогаш фрустрирачко за идните мајки, но ретко доведува до компликации и не би требало да биде показател за породување со царски рез.
Брзо породување
Брзото породување се однесува на породување кога бебето излегува за помалку од три часа откако ќе почнат трудовите.
“Повеќето нови мајки, брзото породување може да го сметаат за позитивно, но постои одредена загриженост кај нив. Главниот проблем е недостаток на време за да се дојде до болница и да се примат лекови против болка, а може да дојде и до породување во опкружување кое не е стерилно и секако брз присуство на медицински персонал“, наведува д-р Ландри.
Останатите потенцијални проблеми вклучуваат: зголемен ризик од пукање на грлото на матката, крварење од матката или вагината и ризик од инфекции за детето поради нестерилизирано породување.
Вагинално пукање
Сосема е вообичаено подрачјето помеѓу вагината и анусот да пукне за време на породувањето, ако вагиналниот отвор не е доволно широк.
“Околу 90% од жените искусуваат одредено пукање на кожата за време на породувањето. Руптурата од прв или втор степен може да предизвика само мала непријатност која трае неколку недели, но за пукање од трет и четврти степен може да се потребни неколку недели да зарасне”, вели д-р Ландри.
