Секоја фамилија се соочува со предизвици, но она што прави разлика помеѓу оддалеченост и блискост се токму малите, секојдневни навики. Децата најмногу учат преку искуства – преку моменти кога се чувствуваат видени, прифатени и сакани.
Не се работи за совршени рутини или постојан мир во домот, туку за свесно создавање простор во кој секој член на семејството се чувствува дека припаѓа и дека е безбеден.
Создавањето поврзаност не мора да биде тешко. Понекогаш доволни се неколку минути игра, краток разговор или едноставна прегратка – и детето ќе се почувствува сакано и разбрано. Токму овие мали ритуали ја градат довербата и блискоста што на децата им ја дава потребната сила да се справат со животот.
Психологот Џејми Блох сподели 5 едноставни навики што ги имаат среќните и поврзани семејства:
1. Изберете мир наместо хаос
Поврзаноста е поважна од тоа оброкот да биде на маса точно во 18 часот. „Прескокнете го стресот и фокусирајте се на подлабоки начини за поврзување – прегратки, игри, заеднички мали ритуали“, вели Блох.
2. Разговарајте за денот
Создадете дневна навика на размена на приказни – влезете во светот на вашето дете и дозволете и тоа да влезе во вашиот. Дури и краток разговор може да ги отвори вратите на довербата.
3. Играјте заедно
Дури и само 15 минути заедничка игра и смеење ја зајакнуваат поврзаноста и гради сигурна емоционална врска.
4. Вклучете ги децата во обврските
Нека учествуваат во секојдневните задачи – така ќе развијат самостојност и самодоверба. Можат да помагаат во кујна, да подредуваат играчки или да подготват облека за следниот ден.
5. Покажете љубов на начинот што ним им одговара
Забележете го јазикот на љубовта на вашето дете – и секојдневно одговарајте на него. Некои деца сакаат допир, други зборови, трети време. Љубовта станува најсилна кога е разбрана.
Малите ритуали ја градат големата врска
„Родителството е полно со подеми и падови. Клучот е во создавање мали, секојдневни ритуали што ја зајакнуваат врската – дури и тогаш кога поставувате граници. Кога децата се чувствуваат поврзано, се чувствуваат безбедно, почитувано и поотпорно. Донесуваат подобри одлуки и полесно се справуваат со животот“,
заклучува психологот Џејми Блох.
