Го сакате вашето дете безусловно. Но, како што знае секој зафатен родител, понекогаш е тешко дури и да се најде време за да земете здив, а камоли да му покажете на детето колку го обожавате. За среќа, постојат неколку едноставни работи што можете да ги вклучите во вашата дневна рутина, а кои ќе го утешат вашето дете и ќе го уверат во вашите чувства кон него/неа. Прочитајте што издвојува психологот Лине Џордан:
- Спуштете го мобилниот телефон
Во денешно време, животот без паметен телефон би бил чуден. Но важно е да одвоите време од социјалните мрежи или проверување на мејлови за целосно да се фокусирате на вашето дете. „Од време на време е важно да му дадете целосно, неделено внимание на детето. Но исто така е важно да го балансирате тоа со фактот дека детето треба да научи дека вниманието често се дели со други – вклучувајќи мобилни телефони и таблети“, објаснува д-р Џордан.
- Поминете квалитетно време со секое дете посебно
Ова важи за родителите кои имаат повеќе деца. Важно е да посветите квалитетно време на секое дете посебно, дури и ако се работи за само 15 минути дневно – токму тие 15 минути му значат многу и му покажуваат колку ви е важно. „Бидете конкретни, за детето да знае дека сте одвоиле време само за него/неа“, вели д-р Џордан. Тоа може да биде нешто едноставно, како читање приказна за добра ноќ или целодневен заеднички излет, ако имате време.
- Поставете граници
Можеби звучи чудно, но домашните правила и границите всушност му помагаат на детето да се чувствува сигурно и утешено… дури и кога се жали дека мора да легне порано или дека треба да остане на масата додека сите не завршат со јадењето. Д-р Џордан објаснува: „Важно е да има некаква структура и правила, за сите да знаат што се очекува од нив. Рамнотежата меѓу флексибилност и граници значи посреќно и побезбедно детство.“
- Играјте се со детето
Од бојадисување до моделирање – вашето дете уште повеќе ќе ужива во своите активности ако и вие му се придружите. „Играњето со детето ви помага да се поврзете со него и да му потврдите дека го сакате“, вели д-р Џордан и додава дека најдобро е да учествувате во активности во кои и самите уживате, бидејќи така ќе бидат позабавни и за вас и за детето.
- Не го прекинувајте детето
Понекогаш децата многу зборуваат. МНОГУ. Но, дури и ако вашето дете по стоти пат го поставува истото прашање – важно е да не го прекинувате. „Внимателното слушање е многу важно за детето. Во ред е да го прекинете додека дискутирате некоја тема, но секогаш дозволете му да заврши со тоа што сака да го каже“, објаснува д-р Џордан.
- Потрудете се да ги запознаете пријателите на вашето дете
Некои од пријателите на вашето дете можат да бидат малку… иритантни (особено оние кои одбиваат да споделуваат). Но, ако организирате игри и дружења и покажувате интерес за пријателите на вашето дете – вие му покажувате колку ви е важно. „На детето многу му значи кога ги поканувате неговите/нејзините пријатели на игра и кога се трудите да ги запознаете. Сето тоа е дел од нашата вклученост во животите на нашите деца“, заклучува д-р Џордан.
