Родителите секојдневно добиваат бројни совети во врска со здравјето и негата на децата. Тие совети во повеќето случаи може да помогнат, но некогаш, доколку се погрешни, може да доведат до големи заблуди и да нанесат голема штета. Ова се најчестите совети во врска со здравјето и негата на забите кај децата кои се погрешни и потенцијално опасни.
Заблуда 1: Млечните заби не се важни
ВИСТИНА: Млечните заби се многу важни. Тие им овозможуваат на децата правилно џвакање, адекватен говор, правилен развој на орофацијалниот систем и чуваат простор за соодветно позиционирање на трајните заби. За трајните заби да се развијат правилно, важно е оралната шуплина во која ќе никнат да биде целосно здрава. Ако млечните заби се зафатени со кариес, тој може да се пренесе и на трајните заби, бидејќи е инфективно заболување.
Заблуда 2: Млечните заби не се поправаат и не се вадат
ВИСТИНА: Млечен заб кој е зафатен со кариес треба да се лекува. Доколку е потребно, во случаи кога третманот е невозможен, потребно е да се отстрани. Погрешно е да се оставаат вакви заби во устата, бидејќи тие можат да имаат штетен ефект, покрај на преостанатите заби и околните ткива, и на зачетоците на трајните заби и на општата здравствена состојба на детето.
Заблуда 3: Не е потребно да се носи детето на стоматолог се додека ништо не го боли
ВИСТИНА: Првата посета на детето на стоматолошката ординација е исклучително важна. Правилно испланирана, таа може да биде многу добра основа за одржување на оралното здравје на детето. Затоа е исклучително важно детето за прв пат да дојде во ординација со здрави заби и уста, додека нема проблеми стоматолошки проблеми. Најдобро е детето да посети стоматолог пред првата година.
Заблуда 4: Мачкањето бели вино на непцата ќе му помогне на бебето при никнување на забите
ВИСТИНА: Мачкањето бело вино само ќе овозможи апсорпција на алкохолот од местото на мачкање во крвотокот на бебето. За да се олеснат нелагодностите при никнување на заби кај децата, постојат голем број прилагодени гелови и глодалки.
Заблуда 5: Симпатично е кога мајка бакнува мало дете во уста
ВИСТИНА: Иако бакнежот помеѓу мајка и дете е многу интимен чин, со бакнувањето во уста мајката на детето ќе му пренесе орални кариогени бактерии и ќе го изложи на ризик за појава на кариес.
Заблуда 6: Цуцлата се става во мед
ВИСТИНА: Нема потреба цуцлата да се мачка со мед. Оваа навика допринесува и за ризик од појава на циркуларен кариес.
Заблуда 7: Мајката ја става бебешката цуцла во уста
ВИСТИНА: Ова е многу штетна и нездрава навика. На овој начин, мајката пренесува бактерии од својата усна шуплина директно на бебето, изложувајќи го на ризик за појава на инфекции и орални заболувања.
