Повеќе од три милиони деца ширум светот се смета дека починале во 2022 година како резултат на инфекции отпорни на антибиотици, според студија на двајца водечки експерти за детско здравје.
Најмногу изложени на ризик се децата во Африка и во Југоисточна Азија.
Антимикробната резистенција (AMR) се појавува кога микробите што предизвикуваат инфекции еволуираат на начин што прави антибиотиците да не делуваат повеќе. Таа е идентификувана како една од најголемите закани по јавното здравје на светската популација.
Некои бактерии развиле отпорност на одредени лекови поради нивната прекумерна или несоодветна употреба, додека развојот на нови антибиотици, кој е долг и скап процес, драстично е забавен
Нова студија сега открива каков е ефектот на антимикробната резистенција (AMR) врз децата. Користејќи податоци од повеќе извори, вклучително и од Светската здравствена организација (СЗО) и од Светската банка, авторите на Извештајот пресметале дека во 2022 година имало повеќе од три милиони детски смртни случаи поврзани со инфекции резистентни на лекови.
Експертите велат дека оваа нова студија покажува повеќе од десеткратно зголемување на инфекции поврзани со антимикробната резистенција (AMR) кај децата во период од само три години. Овој број можеби дополнително е влошен поради влијанието на пандемијата со Ковид-19.
ЗГОЛЕМЕНА УПОТРЕБА НА АНТИБИОТИЦИ
Антибиотиците се користат за лекување или спречување на широк спектар бактериски инфекции – од кожни инфекции до пневмонија. Тие понекогаш се даваат и превентивно, на пример, кога некој треба да се подложи на операција или прима хемотерапија за рак. Антибиотиците немаат никаков ефект врз вирусни инфекции – како настинка, грип или Ковид-19.
Но, некои бактерии сега развиле отпорност на одредени лекови поради нивната прекумерна или несоодветна употреба, додека развојот на нови антибиотици, кој е долг и скап процес, драстично е забавен.
Најдобар начин да се избегне резистентна инфекција е да се спречи инфекција воопшто – што бара повисоко ниво на имунизација, подобра санитарна заштита и хигиена
Водечките автори на Извештајот, доктор Јанхонг Џесика Ху од Институтот за детско здравје „Мердок“ во Австралија и професор Херб Харвел од „Clinton Health Access Initiative“, укажуваат на значителен пораст на употребата на антибиотици што треба да се користат само во случаи на најсериозни инфекции.
Меѓу 2019 и 2021 година, употребата на т.н. „антибиотици за внимателна употреба“ – лекови со висок ризик од развој на отпорност – пораснала за 160 % во Југоисточна Азија и 126 % во Африка.
Во истиот период, употребата на „резервни антибиотици“, лекови што се даваат само во крајни случаи на тешки, мултирезистентни инфекции, пораснала за 45 % во Југоисточна Азија и 125 % во Африка.
СÈ ПОМАЛКУ ОПЦИИ
Авторите предупредуваат дека, доколку бактериите развијат отпорност и на овие лекови, ќе останат многу малку, или воопшто никакви алтернативи за лекување на мултирезистентни инфекции.
Професор Харвел ќе ги презентира наодите на Конгресот на Европското друштво за клиничка микробиологија и инфективни болести во Виена подоцна овој месец.
„Антимикробната резистенција (AMR) е глобален проблем. Ги погодува сите. Ја направивме оваа анализа за да се фокусираме на тоа колку антимикробната резистенција (AMR) непропорционално ги погодува децата“, истакна проф. Харвел. „Пресметавме дека во светот имало три милиони смртни случаи кај деца поврзани со антимикробна резистенција.“
Овие наоди треба да послужат како повик за будење за глобалните здравствени лидери. Без одлучни чекори, антимикробната резистенција (AMR) би можела да го поткопа напредокот, постигнат со децении, во здравјето на децата, особено во најранливите региони во светот“
ИМА ЛИ РЕШЕНИЕ ЗА АНТИМИКРОБНАТА РЕЗИСТЕНЦИЈА (AMR)?
СЗО ја опишува антимикробната резистенција (AMR) како една од најсериозните глобални здравствени закани, но професорот Харвел предупредува дека нема едноставни решенија.
„Станува збор за многуслоен проблем што допира до сите аспекти од медицината, па дури и секојдневниот живот,“ вели тој. „Антибиотици има насекаде околу нас, тие завршуваат и во храната и во околината, па затоа не постои едно решение.“
Антимикробната резистенција (AMR) се појавува кога микробите што предизвикуваат инфекции еволуираат на начин што прави антибиотиците да не делуваат повеќе
Најдобар начин да се избегне резистентна инфекција е да се спречи инфекција воопшто – што бара повисоко ниво на имунизација, подобра санитарна заштита и хигиена, додава тој.
„Ќе има сè поголема употреба на антибиотици бидејќи има сè повеќе луѓе што ги бараат, но мора да се користат правилно и да се избираат соодветните лекови.“
Д-р Линдзи Едвардс, виш предавач по микробиологија на Кралскиот колеџ во Лондон, вели дека новата студија „претставува сигнификантно и алармантно зголемување во споредба со претходните податоци“.
„Овие наоди треба да послужат како повик за будење за глобалните здравствени лидери. Без одлучни чекори, антимикробната резистенција (AMR) би можела да го поткопа напредокот, постигнат со децении, во здравјето на децата, особено во најранливите региони во светот“, пренесува „Би-би-си“.
