Коавторот на студијата, професор Димитрис Дрикакис, од Универзитетот во Никозија, вели дека маската сама по себе не може да го спречи целосно транспортот на капките од плунката
Коронавирусот може да помине помеѓу две лица кои стојат на растојание од приближно еден метар, дури и ако еден од нив носи заштитна маска, предупредува најновата студија.
Истражувачите од Универзитетот во Никозија на Кипар исто така откриле дека маските стануваат уште понеефикасни кога луѓето постојано кашлаат во нив.
Научниците велат дека наодите се „алармантни“ – и ја потенцираат важноста за почитување на правилото за одржување два метри растојание, дури и кога се носат маски.
Коавторот на студијата, професор Димитрис Дрикакис, од Универзитетот во Никозија, рече дека маската сама по себе не може да го спречи комплетно транспортот на капките од плунката.
„Многу капки навлегуваат во штитот на маската, а некои честички на вирусот во плунката можат да патуваат повеќе од 1,2 метри“, рече тој, иако повеќето патуваат под 1 метар.
Повторното кашлање, основен симптом на коронавирус, ја намалува ефикасноста на маската за лице
Се верува дека маските за лице го забавуваат ширењето на пандемијата, но малку е познато колку добро функционираат или под кои услови не го прават тоа. Студијата, објавена во журналот „Physics of Fluids“, откри дека маските за лице можат да го намалат пренесувањето на капките во воздухот, но не и да ги елиминираат комплетно.
Без маска овие капки патуваат двапати подалеку, така што носењето на маска ќе помогне во намалувањето на ризикот од пренесување на смртоносната болест. Сепак, повторното кашлање, симптом на коронавирус, ја намалува ефикасноста на маската и така се пропупуштаат повеќе капки.
Истражувачите користеле прецизен компјутерски модел за да ги исцртаат очекуваните модели на проток кога кашла лице кое носи заштитна маска. Тие ги земале предвид потенцијалните временски услови, турбуленцијата на воздухот, па дури и температурата на кожата и устата на лицето кое кашла.
„Резултатите се алармантни. Дури и кога се носи маска, некои капки можат да патуваат на значително растојание за време на периоди на благо кашлање“, напишаа авторите.
Тие ги советуваа и здравствените работници да носат комплетна ППЕ (лична заштитна опрема) кога се грижат за пациент. Ова треба да вклучува шлемови со вградени филтри за воздух, визири, наметки за еднократна употреба и два пара на ракавици, кои редовно треба да се менуваат. (Дејли мејл)
