Вашето дете има осип и го чеша кожата, добило пролив и грчеви или кашла и отежнато дишe? Тоа се се можни знаци на алергиска реакција на некој вид на храна, кои неретко се повлекуваат подоцна во животот.
Доколку мајката има алергиска реакција на храна, многу е веројатно дека и детето ќе развие алергија, но алергиската реакција не мора да биде на ист вид на храна.
Зошто доаѓа до алергија?
Алергијата е реакција на имунитетот на состојка од околината или од храна, која организмот ја препознава како штетна и лоша. Најчесто таа состојка е белковина која се нарекува алерген. Организмот, алергенот од намирниците го препознава како штетен, и започнува битка со антителата IgE за да го отстрани. Еднаш кога организмот ќе го препознае алергенот како штетен, тој го запомнува и при секој негов следен влез во организмот, доаѓа до нова битка помеѓу антителата IgE и алергенот, и доаѓа до појава на симптоми на алергија.
Детето со алергенот прв пат се среќава во мајчината утроба или во текот на доењето. Уште тогаш детето може да развие пречувствителност на некоја намирница, т.е. уште тогаш почнува да создава антитела. Тоа се нарекува сензибилизација. Најчесто алергиските реакции кај децата се поврзани со консумирање на јајца, кравјо млеко, соја, кикирики, како и риба и школки.
Најдобра диетотерапија кај алергиската реакција е елиминациската диета. Доколку постои одредена храна која на вашето дете му предизвикува пречки, најдобро е таа храна привремено да се исфрли од исхраната. Клучно е при такви диети да се посоветувате со стручно лице, за да се избегне прехранбен дефицит. На детето му е исклучително важна правилната исхрана која ќе му ги обезбеди сите потребни нутриенти и енергија за правилен раст и развој.
Често децата кои имаат алергиска реакција на сурови намирници не реагираат на таа намирница ако претходно е сварена или печена. На пример ако вашето дете е алергично на сурова, свежа јаболка, не мора да значи дека ќе биде алергични на колач од јаболки или компот. Многу често со варење или печење, намирницте може да го намалат или уништат алергенот во храната и на тој начин ја прават намирницата безбедна за детето.
