Алергиските реакции обично се јавуваат набрзо по убодот, до еден час, кога крвните клетки се шират. А при повеќекратни убоди може да дојде и до труење на организмот, кога симптомите ќе се појават и по неколку часа или денови.
“Отровите на пчелите, осите, стршлените се нарекуваат веноми и се протеински структури, односно се ензими. Кај преосетливите алергични лица тие може да предизвикаат голема локална реакција или општа системска анафилактична реакција“, вели алергологот проф. д-р Санвила Рашковиќ.
Таа објаснува и како се манифестира таа реакција. “Се манифестира како уртикарија, ангиоедем, гушење со свирење во градите, иритација на дигестивниот тракт, пад на крвниот притисок, колапс, губење на свеста. Опишани се случаи на срцев удар по каснување од инсекти“.
Од што зависи колку некој бурно ќе реагира на убод од овие инсекти?
“Степенот на алергија, односно бурната реакција зависи од количината на инјектираниот отров и степенот на алергија кај одредена личност. Освен тоа, важно е дали ве каснал еден или повеќе инсекти.
Ако на пример ве убоде една оса, а не сте алергични, тогаш ништо страшно нема да се случи. Но, кога ќе ве нападне рој, многу зависи од вкупната количина на отров што влегла во вашето тело. Истражувањата велат дека 500 или повеќе убоди значат смрт. Исто така, за оние кои се алергични и еден убод може да биде фатален доколку навреме не се преземат неопходните мерки.
Убодите во пределот на главата, усната шуплина и вратот се особено опасни бидејќи можат да предизвикаат задушување, па затоа е неопходно итно да се јавите на лекар.
Како да се заштитите?
Алергологот објаснува и што подразбира профилакса, односно збир на постапки кои се превземаат при убод од оса, пчела или стршлен.
“Во зависност од тежината на клиничката слика и наодите, се планира специфична имунотерапија за убод од инсекти. Советувам овие лица да земаат антихистаминици во текот на летото и да имаат со себе епи-пен, односно прибор за самопомош “.
Имено, оние кои знаат дека се алергични на убоди од пчела или оса обично носат со себе дози на адреналин, односно автоматска инјекција на адреналин што се дава во натколеницата или надлактицата и може да спаси живот.
Проф. д-р Рашковиќ објанува и во кој период од животот може да се јави алергиска реакција на убод од пчела или оса.
“Алергиските реакции на каснувања од инсекти може да се појават на која било возраст. Многу пациенти се пчелари, членови на нивните семејства и луѓе кои често престојуваат во природа. Поради сето ова, важно е да се заштитите однапред што е можно повеќе. Се препорачува лицата со високо ниво на алергии да не користат силни парфеми во текот на летото, да не носат облека со силни бои, да не пијат слатки пијалоци, да не јадат сладолед на отворено и едноставно да избегнуваат контакт со овие инсекти“.
