Панел од надворешни советници на американската Управа за храна и лекови (ФДА) во четвртокот со големо мнозинство гласаше за одобрување на итна употреба на вакцината против коронавирус на компанијата „Фајзер“, отворајќи и го патот на Управата да ја одобри вакцината за нацијата којашто изгуби повеќе од 285,000 животи поради COVID-19, пренесува Ројтерс.
Речиси е сигурно дека Управата за храна и лекови на САД (FDA) ќе даде итно одобрување за користење на вакцината во наредните часови или денови. Дистрибуцијата и инокулациите во САД се очекува да започнат веднаш по одобрувањето.
-
Медицинските експерти гласаа 17-4 во корист на вакцината, а 1 член на панелот беше воздржан
„Ова е историски момент“, рече Ерик Диксон, извршен директор на „UMass Memorial Health Care“, кој не беше во советодавниот панел, по гласањето. Тој ја нарече вакцината на „Фајзер“ „најдоброто решение кое ќе не извлече од сегашнатата ситуација и ќе ни помогнеме да спасиме животи“.
„Конечната одлука за тоа дали да се одобри вакцината за итна употреба ќе биде донесена од официјалните лица на ФДА“, се вели во соопштението на ФДА.
На панелот, исто така, се дискутирало и за загриженоста покрената од двата случаи на сериозни алергиски реакции кај приматели на вакцини во Велика Британија, како и што да им се советува на бремените жени, кои беа исклучени од студиите. За време на состанокот на панелот ФДА рече дека нема доволно податоци да се поддржи или да не се поддржи употребата на вакцината кај бремени жени. Агенцијата препорачува тие сами да ја донесат одлуката за вакцинација со совет од нивните лекари, пренесува „Ројтерс“.
За разлика од САД, Велика Британија не препорачува вакцинирање против COVID-19 за бремени жени и оние кои планираат да останат бремени.
