ПИШУВААТ:
Д-р Кристофер Снајдер & Д-р Бред МекКвилкин, педијатриски кардиолози,
Американска академија за педијатрија
♦♦♦♦♦♦♦
Кога станува збор за здравјето на вашето дете, дали размислувате многу за неговиот ризик за срцеви заболувања? Веројатно не, бидејќи грижата за детското здравје најчесто значи справување со воспалени грла, изгребани колена и други тековни проблеми. Сепак, најновите истражувања ги поттикнаа лекарите и родителите да посветат поголемо внимание на здравјето на срцето кај децата.
Доказите покажуваат дека секојдневните навики потребни за спречување на срцеви проблеми имаат поголемо влијание ако се стекнат уште од рана возраст. Во продолжение – совети кои ќе ви помогнат да го намалите ризикот од срцеви заболувања кај вашето дете и целото семејство.
Како нашето срце нè одржува во живот
Срцето е моќен орган кој пумпа крв до секој дел од нашето тело. Без него, нашите клетки и ткива не би добиле кислород и хранливи материи од храната и пијалаците што ги внесуваме. Ова е причината зошто кога нашето срце не работи правилно, нашето целокупно здравје исто така страда.
Коронарните артерии се крвните садови што носат крв од срцето низ целото тело. Одржувањето на овие артерии силни и чисти од масни наслаги е од клучно значење за здравјето на срцето. Постојат многу причини за срцеви заболувања, но коронарната артериска болест е една од најсериозните закани за здравјето на вашето дете во зрелата возраст.
Постојат многу причини за срцеви заболувања, но коронарната артериска болест е една од најсериозните закани за здравјето на вашето дете во зрелата возраст
Најважни навики за здраво срце што треба да им ги пренесете на вашите деца
Децата сакаат да учат. Ова им дава на родителите природна предност во помагањето да изградат добри навики кои помагаат да се спречат срцеви заболувања. Еве секојдневни практики кои ќе ви помогнат вам и на вашите деца да живеете здрав начин на живот.
- Јадете здраво
Вашето семејство ќе има голема корист од исхрана богата со овошје, зеленчук, интегрални житарици, немасни меса, млечни производи со намалена масленост, грав и мешунки. Всушност, правилната исхрана е еден од главните фактори за превенција од кардиоваскуларни болести, вклучително и срцев удар и мозочен удар.
Кога размислувате за исхраната на вашето семејство, обидете се да ги намалите ултраобработените намирници, кои често содржат високо ниво на шеќери и заситени масти – два главни непријатели на здравјето на срцето.
- Бидете активни
Без разлика дали вашето семејство се занимава со организирани спортови, активна игра, домашни обврски или возење велосипед и пешачење наместо користење автомобил – сè е корисно!
Американската академија за педијатрија (ААП) препорачува децата над 6 години да имаат најмалку 60 минути физичка активност дневно.
- Одржувајте здрава телесна тежина
Вишокот килограми го оптоварува срцето, што може да ги оштети срцевите мускули. Исто така, зголемената телесна тежина е поврзана со висок холестерол, висок крвен притисок и дијабетес – три состојби што го зголемуваат ризикот од срцеви заболувања.
ААП препорачува децата без семејна историја на срцеви заболувања да направат тест за холестерол меѓу 9 и 12 години
Добрата вест е дека правилната исхрана и редовната физичка активност помагаат во одржувањето на индексот на телесна маса (BMI) под 25, што се смета за здраво ниво за срцето.
- Следете го нивото на холестерол
Холестеролот е леплива, масна наслага што може да ги затне артериите, отежнувајќи му на срцето да испумпува крв низ телото. Воведувањето здрава исхрана уште во детството може да помогне во одржувањето на ниско ниво на холестерол во зрелата возраст.
Тестирањето на холестерол исто така игра важна улога. ААП препорачува децата без семејна историја на срцеви заболувања да направат тест за холестерол меѓу 9 и 12 години.
Американската академија за педијатрија (ААП) препорачува децата над 6 години да имаат најмалку 60 минути физичка активност дневно
Сепак, ако вашето дете има блиски роднини (родител, баба, дедо, тетка или вујко, на пример) со коронарна срцева болест или висок холестерол, проверката може да започне уште од 2-годишна возраст. Ова рано тестирање, врз основа на семејната здравствена историја, може да спаси животи и да овозможи навремени промени во исхраната, физичката активност и евентуално во лекувањето.
Ако тестовите покажат високо ниво на холестерол кај вашето дете, консултирајте се со педијатар за евентуални наследни ризици, кои може да се менаџираат со соодветен третман.
- Намалете го стресот
Како родител, сигурно сте запознаени со секојдневниот стрес. Но, вашето дете ќе забележи (и ќе има корист) ако создадете навика да се опуштате. Хроничниот стрес може да доведе до таложење на плаки во артериите, што го зголемува ризикот од срцев удар, срцева слабост и неправилен ритам на срцето.
Грижете се добро за себе и поттикнете ги вашите деца да го прават истото. Не е битно што прават децата за да се релаксираат – јога, читање, медитација, пишување дневник или нешто друго – важно е само да се одвои време за одмор.
- Доволно спиење
Патувањата, сезонските промени и напорните спортски или училишни обврски можат да го нарушат детскиот сон. Сепак, многу е важно да се создаде навика за редовен и квалитетен одмор. (Истражувањата покажуваат дека недоволното спиење може да доведе до зголемување на телесната тежина и лоши избори во исхраната!)
- Избегнувајте пушење
Употребата на тутун е познат фактор за срцеви заболувања – како за пушачите, така и за луѓето што живеат со нив. Пасивното пушење може да го загрози здравјето на вашето дете и да му даде погрешна порака дека пушењето е во ред. Иако откажувањето од пушење е предизвик, ослободувањето од тутунот значително ќе го подобри вашето здравје и здравјето на вашето дете. (Извор: ААП)
