Ароматерапија во бременоста

Примената на ароматерапија во бременоста може да биде многу корисна во насока на ублажување на чувството на исцрпеност, намалување на отоците на рацете и нозете, стравот од породување но треба да се внимава при користењето.

Лекарите велат дека во текот на бременоста доаѓа до значајни функционални и анатомски промени во целиот организам на жената. Сите промени за време на бременоста се манифестираат преку раст и засилена функција на повеќето органи. Со тоа, се случуваат и промени на половите органи, крвотокот, дишните, уринарните и органите за варење, како и во лачењето на хормоните и промени на коските, мускулите и кожата. Не смее да се заборават и промените на душевната состојба бидејќи бременоста влијае на жената не само како биолошко случување, туку и како збир на психолошки преживувања (желби, стравови и чувства).

Примената на ароматерапија во бременоста може да биде многу корисна во насока на ублажување на чувството на исцрпеност, намалување на отоците на рацете и нозете, намалување на стравот од породување но, треба да се внимава при користењето. Особено тоа важи за првите три месеци од бременоста, бидејќи тогаш е поголема опасноста од спонтан абортус, а многу етерични масла го поттикнуваат менструалниот циклус и поради тоа може да биде опасна.  

Во првото тромесечје може да се користат етерични масла од мандарина, портокал, гераниум, но исклучиво во дифузер. Потоа може да се нанесуваат и на кожата преку масажа. Масажите имаат позитивен ефект на бременоста бидејќи го подобруваат расположението и релаксираат. Притоа треба да се внимава концентрацијата на етеричните масла да не е поголема од 2% и масажите да бидат благи и нежни. Од големо значење е и секојдневната нега бидејќи на тој начин се храни кожата и се избегнува појава на стрии.

 

Непријатното отекување на рацете и нозете во последното тромесечје може да се спречи така што во 50мл ладно цедено масло се додадат три капки етерично масло од лаванда и четири капки етерично масло од чемпрес и се прави масажа на рацете и нозете во насока кон срцето.

Препорака до сите трудници – негувајте се, опуштете се, радувајте се на бебето кое доаѓа, и бременоста ќе ви биде преубава состојба!