Според извештајот, 49-годишната жена починала како резултат на сериозно нарушување на коагулацијата на крвта, а 35-годишната развила белодробна емболија, но се опоравува
Австриските власти привремено ја прекинаа вакцинацијата со серија вакцини против Ковид-19 од компанијата „АстраЗенека“, додека трае истрагата за смртта на едно лице и развојот на белодробна емболија кај друго лице по вакцинирањето, објави австрискиот Државен завод за здравствена безбедност (BASG).
BASG добил два извештаи кои се поврзани со вакцина од истата серија на „АстраЗенека“, а пациентите ја примиле на клиника во градот Цветл во покраината Долна Австрија, се вели во соопштението. Според извештајот, 49-годишната жена починала како резултат на сериозно нарушување на коагулацијата на крвта, а 35-годишната развила белодробна емболија, но се опоравува.
Белодробна емболија е акутно нарушување предизвикано од ненадејна акумулација на згрутчена крв во пулмоналната артерија со последователна опструкција на протокот на крв во ткивото на белите дробови.
„Во моментов нема докази за причинско-последична врска помеѓу овие состојби и вакцината“, соопштија од BASG.
Швајцарскиот весник „Niederoesterreichische Nachrichten“, телевизијата ОРФ и новинската агенција АПА објавија дека и двете жени се медицински сестри вработени на клиника во градот Цветл.
Во соопштението на BASG се вели дека згрутчувањето на крвта не е меѓу познатите несакани ефекти на вакцината и се додава дека веднаш е покрената истрага за целосно да се исклучи каква било потенцијална врска помеѓу вакцината и овие здравствени проблеми, односно фаталниот исход.
„Како претпазливост повеќе не ги користиме преостанатите залихи од оваа серија вакцини на „АстраЗенека“, се вели во соопштението.
Новинската агенција АПА го пренесува соопштението на претставникот на „АстраЗенека“ кој вели дека компанијата е во контакт со австриските власти и ја поддржува истрагата. Агенцијата потсетува дека вакцината е одобрена и од Европската агенција за лекови и од Светската здравствена организација врз основа на глобално клиничко испитување во кое учествувале 23 000 испитаници.
„Сите досегашни евалуации покажаа дека вакцината на „АстраЗенека“ против Ковид-19 е безбедна и ефикасна“, објави АПА, а пренесува „Хина“.
