Можеби звучи како бапска приказна, но многу научни истражувања покажале дека ставањето зелени листови зелка на дојките помага при отечени, преполнети гради со млеко.
По породувањето, поради зголеменото производство на млеко, се јавува првична исполнетост на дојките. Ако се дои на барање на бебето и без ограничено времетраење на подојот, чувството на преполнетост исчезнува. Меѓутоа, ако подоите се нередовни и ако дојката не се празни, доаѓа до блокирање на млечниот канал. Дојката е отечена и болна, а кожата е напната, сјајна и топла. Често може да се напипаат грутки под кожата, најчесто на едната дојка. Тоа најчесто е знак дека бебето не се хранело доволно често и дека доењето е премногу кратко и неефикасно. Обично се јавува 3-6 дена по раѓањето.
Листови од зелка: вистина или мит?
Можеби звучи како бапска приказна, но многу научни студии покажале дека ставањето зелени листови зелка на градите помага при отечени, преполнети гради. Тоа делува толку добро, што постојат упатства за употреба на зелката.
Како да ги користите листовите од зелка
За облоги се користат свежите внатрешни листови на зелена зелка (црвената зелка ќе делува на ист начин но може да ја обои вашата кожа додека се загрева). Може да се користат оладени или на собна температура, во зависност од тоа што и е поудобно на мајката.
- Отстранете ги тврдите надворешни листови, а потоа излупете два внатрешни листови на зелка;
- Измијте ги листовите и исушете ги;
- На листовите најпрво им се отстранува тврдата средна жила и се прави дупка за брадавицата, па потоа се завиткува околу градите и се прицврстува со градник;
- Држете ги листовите околу 20 минути или додека не се загреат. Можеби ќе почне да истекува млеко како што градите ќе стануваат помеки, но тоа е сосема нормално;
- Повторете 2-3 пати на ден користејќи секогаш свежи листови зелка.
Листовите од зелка не смеат да се користат подолго од вкупно 8 часа, што е приближно времето во кое доаѓа до намалување на преполнетоста и чувство на олеснување. Веднаш штом ќе се смири отокот и ќе попушти отеченоста, треба да престанете со облозите.
Отечени, преполнети дојки се непријатни, но тоа би требало да помине за неколку дена. Тогаш ќе се воспостави рамнотежа помеѓу понудата и побарувачката. Иако ова најчесто се случува во првите денови на доење, тоа може да се случи и во кое било друго време. Затоа, обрнете посебно внимание на своите гради кога доаѓа до промени во исхраната на вашето бебе и кога ќе решите да престанете со доењето.
Ако вашите гради се се уште болни, најдобро е да побарате совет од вашиот лекар.
