Бебето е дома. Мајката е среќна, најтешкото е зад неа, а таткото е возбуден и среќен. А, сега следи првата недела на запознавање со бебето и навикнување на родителската улога. Веќе нема враќање на старо, а во вашите глави има безброј прашања на кои итно ви е потребен одговор. Ова се одговорите на најчестите прашања што ги мачат новите родители.
- ШТО Е СО СПИЕЊЕТО?
Ако има нешто за кое новите мајки толку многу се грижат, тоа е сонот, нивниот и на бебето. “Дали моето дете некогаш ќе спие и како да го постигнам тоа?“ Одговорот е да, и зависи. Можеби мислите дека вашето бебе никогаш нема да спие нормално, но ви ветуваме дека тоа ќе се случи. Сонот зависи и од уникатните потреби и карактеристики на вашето бебе, затоа слободно експериментирајте со различни трикови и техники за успивање и што подолг сон, се додека не ги пронајдете оние кои ви одговараат.
- ДОБИВА ЛИ МОЕТО ДЕТЕ ДОВОЛНО НА ТЕЖИНА?
Без разлика што сте загрижени дали вашето бебе добива премногу тежина или недоволно, мораме да кажеме дека загриженоста за физичкиот раст е дефинитивно една од најчестите грижи на родителите. “Секогаш се прашував дали моето бебе е гладно и без загрижена за неговата тежина“, вели Силва, мајка на едногодишно момче. “Ми се чинеше толку мало, но бројките покажуваа дека тежината одговара на возраста. На мајката никогаш не и е доволно. Ми се чинеше дека столицата му е премногу ретка, па си помислував дека можеби може да го однесам и детето и пелената кај педијатарот, но сепак не го направив тоа“.
Како и секогаш ‘вистинскиот’ одговор зависи од бебето. Бебето би требало да ја вратат својата родилна тежина во рок од околу две недели. Тоа е најдобар показател дека бебето напредува.
- ПЛАЧЕ ЛИ МОЕТО БЕБЕ ПРЕМНОГУ?
Бебињата плачат. Многу. Има смисла, бидејќи тоа е нивно единствено средство за комуникација. Без оглед што многу плаче, голема е веројатноста со вашето дете да е се во ред. Бебињата плачат кога се гладни, кога се мокри, кога се поспани и од ред други причини. Вие треба само да останете смирени и трпеливи бидејќи плачењето сигурно ќе престане.
- КАКО ДА МУ ПОМОГНАМ НА БЕБЕТО ДА ПОДРИГНЕ?
Логично е новите родители да се грижат за тоа како ќе ги подригнат доенчињата. Се чини дека е тешко да се препознае границата помеѓу ефикасно подригнување и случајно повредување на вашето малечко.
Најчестиот метод е да го ставите бебето преку вашето рамо додека лесно го тапкате по грбот. Можете исто така да го седнете бебето во скут, со едната рака да му ги држите градите исправени, а другата да го тапкате по грбот. Без оглед на методот што ќе го изберете, важно е да ја држите главата на бебето.
- КОГА МОЖАМ ДА ГО ИЗНЕСАМ НАДВОР БЕБЕТО?
Не постои правило кога е најбезбедно да се изнесе бебето надвор. Се додека ги преземате сите нормални мерки на претпазливост, добро е бебето да се изнесе на свеж воздух. Секако, прилагодете се на временските услови. Ако вам ви е непријатно надвор, тогаш сигурно ќе му биде и на детето. Соодветно облечете го бебето, избегнувајте директно сонце и тргнете!
