Македонија е зафатена од нов силен топлотен бран, со температури кои надминуваат 40 степени. Жештините ќе продолжат до средината на следната недела, а и покрај можните локални дождови во недела, временската состојба ќе остане претежно стабилна и многу топла. Владата, по препорака на Министерството за здравство, донесе мерки за заштита на граѓаните, особено на чувствителните категории, како бремените жени и лицата постари од 60 години, додека здравствените власти апелираат на зголемено внесување течности, избегнување на директно сонце и консумирање лесна храна. Со конкретни совети за исхрана при топло време излезе и Институтот за јавно здравје на РСМ, од каде што препорачуваат лесни и квалитетни оброци.
„Кога е топло, подобро е да се придржувате до лесни, разновидни, добро избалансирани и редовни оброци, составени од сезонски намирници. Храната со висока содржина на вода, исто така ќе ви помогне да бидете хидрирани во летните временски услови“, се вели во препораките на ИЈЗ, кои ви ги пренесуваме во целост.
Како да го разладите Вашето тело за време на топлотен бран?
- Консумирајте зеленчук со висока содржина на вода, како што се домати, краставици, зелка итн.
- Внесувајте помалку калории.
- Консумирајте оброци на течна основа како што се супи и чорби.
- Консумирајте овошје, особено лубеница, диња, праска, кајсија и сл.
Храна што треба да се избегнува при топло време
За време на топлотен бран, треба да избегнувате да јадете многу месо или оброци богати со протеини. Дигестијата на протеини бара поголем дигестивен капацитет, кој создава топлина.
Консумирајте зеленчук со висока содржина на вода, како што се домати, краставици, зелка итн.
Како преку правилна исхрана да ја подготвите кожата за изложување на сонце?
Широк спектар на студии покажаа дека некои витамини (Б3, Ц и Е), каротеноиди, масни киселини и полифеноли може да го намалат ризикот од создавање изгореници од сонце, а со тоа да ја заштитат кожата. Ќе ги разгледаме сите подетално.
Внесот на разновидно овошје и зеленчук е основата на здрава и отпорна кожа.
Омега-3 масни киселини, витамин Б3, и астаксантин
Овие состојки во рибите имаат позитивно дејство врз намалувањето на црвенилото од сончеви изгореници, во зараснувањето на рани, и да се подобри задржувањето на влагата, а со тоа намалување на појавата на брчки.
Како најбогат заеднички извор од животинско потекло за овие три состојки се: лосос, скуша, харинга, сардини, ракчиња. Но, нема да „згрешите“ и со другите видови на риби.
За време на топлотен бран, треба да избегнувате да јадете многу месо или оброци богати со протеини. Дигестијата на протеини бара поголем дигестивен капацитет, кој создава топлина
Како најбогат заеднички извор од неживотинско потекло за овие три состојки се јаткастите производи како ореви, лешници, бадеми, ф’стаци итн.
Ликопен, биофлавоноиди, витамини А, С, Е („витамин за убавина“)
Домати, кајсии, дињи, грозје, праски, лубеници и брусница се најбогат заеднички извор на овие состојки во храната. Со консумирање на овие намирници, можете да ги намалите воспалителните процеси на кожата, предизвикани од дејството на штетните УВ-зраци, а со тоа да ги неутрализирате штетните ефекти на изложување на сонцето.
Бета-каротен
Со бета-каротен кожата побрзо добива потемна боја, се намалува и можноста за појава на алергија на сонце, а секако, има и значаен придонес за побавно стареење. Меѓутоа, за делотворност на бета-каротенот, а со тоа навремена подготовка на кожата за сончање, 2-3 месеци пред летото треба да се зголеми внесот.
Важно е да се напомене дека бета-каротенот треба да се зема во неговата природна форма, односно преку храна како портокалово овошје и зеленчук и темнозелен лиснат зеленчук, бидејќи токму тогаш е најефикасен. Препорачуваме храна која го содржи во големи количини, како што се: моркови, кајсии, праски, манго, лубеници, дињи, спанаќ, зелена салата, блитва, карфиол, брокула итн., советуваат од ИЈЗ на РСМ.
