Иако за немирниот детски сон проследен со плачење може да постојат бројни причини, како грчеви, мокра пелена или глад, понекогаш и кога се е под контрола, бебето едноставно не сака да спие. Но, истражувањата покажале дека децата многу силно реагираат на звуци што може значајно да влијае и на нивното расположение, па дури и на сонот.
Токму поради тоа, на интернет се достапни бројни снимки на т.н. “бели звуци“, кои судејќи според искуствата на бројни мајки и татковци, делуваат како природно средство за смирување.
Белиот шум е звук од типот на шушкање лисја или брмчење на мотор кој содржи мешавина на сите еднакво распоредени звучни фреквенции. Тие создаваат необичен шум кој служи за блокирање односно неутрализирање на несаканите позадински звуци.
Можеби сте забележале или слушнале од други мајки дека бебето го смирува звук што го создава фенот за коса, правосмукалката или машината за перење. Станува збор за звуци, односно еднолични бели шумови кои се многу слични на оние кои бебето ги слуша во мајчиниот стомак, а кои ги смируваат и опуштаат.
