Има ли нешто поубаво, повизвишено, порадосно од моментот кога мајката за првпат ќе го земе своето чедо во прегратка? Кога ќе го помилува, гушне, помириса бебенцето кое уште „неродено“ морало да се бори за својот живот?
Денешнава приказна зборува за еден преран почеток, но со среќна завршница, а доаѓа од ЈЗУ Универзитетска клиника за гинекологија и акушерство – Скопје. Деталите ги објави министерот за здравство доц. д-р Венко Филипче на својот ФБ профил каде што напиша: „На 29 март оваа година на свет дојде Гордан, предвремено родено бебе со 1.220 г телесна тежина. Маја (24), неговата мајка, го родила во 29 недела од бременоста. По еден ипол месец престој на одделот за интензивна нега и терапија на ГАК, период во кој Маја, поради пандемијата, не била во можност да го види своето бебе, Гордан си замина дома со телесна тежина од 2.030 грама во добра општа состојба. Семејството на Гордан е благодарно за пожртвуваноста на персоналот на ГАК и нивната постојана достапност. И јас се придружувам во благодарноста до целиот персонал на ГАК, за целокупната грижа и нега која им ја даваат на мајките и новороденчињата, а на Гордан му посакувам да израсне во здраво и среќно дете“, напиша доц. д-р Филипче.
Уште еден јунак си заминува дома како победник. Нека има среќно детство и долг живот.
