Еден од највозбудливите моменти во пресрет на доаѓањето на приновата е кога ќе им соопштите на родителите дека наскоро ќе станат баба и дедо. Д-р Џена Гловер е психолог и директор за психолошка обука во Педијатрискиот институт за ментално здравје во детската болница во Колорадо. Во интервју за „Ромпер“, таа вели дека вклучувањето на бабите и дедовците е навистина корисно за децата додека растат.
„Постојат многу позитивни придобивки од вклучувањето на бабите и дедовците во животот на нивните внуци. Една од важните работи, особено за помалите деца, е можноста да практикуваат различни видови на односи и интеракции со возрасните. Многу е важно да се има поинаква перспектива на некој што ве сака и е фокусиран на вашата благосостојба, а не е вашиот родител“, објаснува Гловер.
Вклучувањето на бабите и дедовците е навистина корисно за децата додека растат
„Кога станува збор за тинејџерите, бабите и дедовците можат да се справат со работи со кои родителите не можат. Понекогаш можат да му дадат совет на својот внук што би бил поинаку прифатен доколку родителот би го дал истиот совет. Многу малку деца добиваат целосно внимание од возрасните, но поради нивните животни фази, бабите и дедовците често тоа можат да го понудат, што има позитивни предности за децата“.
Исто така, ако вашето дете некогаш доживее непријатно искуство, како на пример, траума поради злоупотреба или занемарување, возрасните лица од доверба може да му помогнат да избегне некои од негативните последици (како што е зголемен ризик од хронични болести и стрес, според ЦДЦ).
„Знаеме дека една од најважните лекции за децата е да ги научиме да бидат отпорни, а такво нешто можеме да постигнеме преку развивање блиски односи на децата со возрасните лица од доверба, а бабите и дедовците се одлична опција за исполнување на таа улога. Тоа е една од најважните улоги кои можат да ги играат“, вели Гловер.
