Во оваа недела почнуваат да се формираат коските и рскавицата, нозете и рацете растат, а се развиваат и прстите на нозете и на рацете. Дланките и прстите на рацете на бебето подобро се развиени од стапалата и од ножните прсти. Движењата се посложени и вклучуваат ротација и доближување и оддалечување на рацете. Бебето се движи многу појасно.
Долго е околу три сантиметри и тешко околу 4 грама. Полните органи може да се видат, но се уште е рано да се одреди дали е во прашање момче или девојче.
Иако развојот на ембрионот е во поодминат стадиум, во вашиот изглед се уште нема знаци на бременост или промените се толку дискретни што само вие можете да ги забележите.
Кожата на лицето може да стане помазна од вообичаено, а лицето и малку да се пополни. Кај некои трудници може да се јават и акни, но оваа појава брзо поминува. За време на оваа недела, нивото на HCG достигнува голема вредност, па утринските мачнини се многу изразени.
Дојките стануваат пополни, и кај повеќето трудници и почувствителни. Можна е појава на засилен вагинален секрет, што не зачудува ако се знае дека нивото на хормонот естриол расте и до 1.000 пати над вредноста.
Препорачаното зголемување на телесната тежина во нормална бременост изнесува 10-12 (15) килограми за време на целиот период на бременоста. Недоволна или прекумерна телесна тежина може да спречи оптимален развој на бебето и да ја отежне бременоста и породувањето.
