♦♦♦♦♦♦♦
Британските научници ќе ги тестираат двете нивни водечки вакцини против COVID-19 врз пациенти за да проверат дали ќе имаат подобар ефект доколку се вдишат, наместо да се дадат со инјекција. Вакцините што ќе бидат вклучени во тестирањето се оние од Кралскиот колеџ во Лондон и вакцината што се развива на Универзитетот во Оксфорд.
-
Учесниците во студијата ќе бидат вакцинирани така што вакцината ќе ја вдишат преку устата
„Се надеваме дека со директно насочување кон клетките во дишните патишта – вообичаеното место на инфекција за респираторните вируси – ќе предизвикаме подобар имунолошки одговор на организмот против вирусот SARS-Cov-2“, се вели во соопштението на Британскиот совет за медицински истражувања, пренесува „Индепендент“.
Д-р Крис Чиу, од Катедрата за инфективни болести на Кралскиот колеџ, го води истражувањето. Тој вели дека постојат докази дека вакцините против грип во форма на назален спреј покажале дека ги штитат луѓето од инфекција и го спречуваат ширењето на болеста, а тој и неговите колеги сакаат да испитаат дали и коронавирусот може да се спречи на тој начин.
„Актуелната пандемија е предизвикана од респираторен вирус кој првенствено ги инфицира луѓето преку клетките на ѕидовите на носот, грлото и белите дробови. Овие површини се специјализирани да произведат поинакви имунолошки одговори, па затоа е клучно да се испита дали можеме да добиеме уште подобар ефект со директно насочување кон овие клетки“, објаснува Чиу.
Испитувањата првично ќе вклучат 30 учесници на возраст од 18 до 55 години.
Истражувањето започнува неколку дена по продолжувањето на третата фаза од клиничките испитувања на оксфордската вакцина, кои беа прекинати поради несаканите ефекти на еден од учесниците.
