ПИШУВА:
Д-р Даница Поповска
специјалист по ортопедија
♦♦♦♦♦♦♦
Во последниов период користењето на тротинет е многу популарно. Освен класичните тротинети, зема замав и користењето на електричните тротинети. Тротинетите можат да бидат опасни, кога се возат во сообраќај или со голема брзина. Незгодите при возење тротинет се сѐ побројни, а при тоа се случуваат и сѐ поголем број на повреди. Повредите настануваат како сообраќајни несреќи со други возила или при пад од тротинетот. Најчесто настануваат помали посекотини, шинувања, истегнувања и скршеници во предел на рачниот зглоб и лактот. Едни од најсериозните повреди се повредите на главата, поради што и децата и возрасните кои возат тротинет секогаш треба да носат заштитен шлем.
Голем дел од овие повреди можат да се спречат, доколку се следат некои основни безбедносни правила:
-
Детето треба да има развиено координација и рамнотежа за да вози тротинет;
-
Тротинетот треба да биде со соодветна димензија за возраста, тежината и способноста на детето;
-
Детето треба да носи заштитен шлем. Пожелно е детето да дојде со вас кога ќе ја купувате кацигата, за да се одбере кацига која му е точна. Доколку наместена и прикопчана кацига може да се поместува на главата на детето напред – назад или во страна, тогаш таа е голема. Не е препорачливо да се купуваат шлемови „на старо“, затоа што не знаете дали претрпел удар и е оштетен. Исто така, при незгоди со удар во главата (во шлемот), потребно е тој да се замени со нов. Кога детето го носи шлемот, тој треба правилно да е закопчан.
-
Добро е детето да носи и друга заштитна опрема – штитници за лактите, рачните зглобови и колената;
-
Обувките треба да обезбедуваат заштита – патики се соодветни обувки за возење тротинет, апостолки не се;
-
Детето треба да биде облечено во јарки бои кога вози во сообраќај или прометни патеки, за да биде видливо;
-
Потребно е прво детето да повежба во некоја сигурна зона, како во дворот или во парк, пред да почне да вози на патека каде има и други тротинети, велосипеди и сл. Потребно е детето да научи правилно да управува и да знае да закочи и да застане безбедно.
-
Родителот или друг возрасен треба да го надгледува детето додека не се стекне со сигурност во возењето и не научи да ги почитува сообраќајните правила. Пожелно е до 10-годишна возраст детето секогаш да биде надгледувано.
-
Тротинетот треба да биде во исправна состојба – треба да се провери дали сите завртки се затегнати, дали кочницата функционира. Подлогата за ногата треба да биде нелизгачка, а даската да не допира до земјата кога детето ќе стапне. Гумираните држачи за рацете не треба да се вртат околу кормилото. Пожелно е тротинетот да има ѕвонче. За ноќно возење е потребно бело светло од предната и црвено од задната страна.
-
Но, децата не треба да возат тротинет ноќе или во услови на намалена видливост.
-
Детето треба да вози тротинет на рамна површина, да избегнува песок, дупки, шахти или влажни површини и вирчиња, како и удолници или тротоари со многу пешаци и ограничена видливост.
ПРОЧИТАЈТЕ ПОВЕЌЕ ОД ИСТИОТ АВТОР,
Д-р Даница Поповска, специјалист по ортопедија
