Доминантна е раката што се користи почесто, поподвижна е и со неа побрзо ги извршуваме задачите. Поголемиот дел од луѓето се деснаци, а нешто помалку од 10 проценти од луѓето се леваци, додека уште помал е процентот на оние кои подеднакво ја користат десната и левата рака и оние кои подобро изведуваат некои дејствија со левата, а некои со десната рака. Доминантната рака се развива со текот на времето, а одредени знаци уште во раната детска возраст откриваат која рака може да стане доминантна.
Некои деца порано ја откриваат својата доминантна рака, некои подоцна
Доминантната рака е задолжена за извршување на фини и груби моторни вештини како што се пишување, сечење, фаќање и фрлање топка.
Дали ќе бидеме леваци или деснаци зависи од генетиката и нашиот мозок и не можеме свесно да го избереме тоа. На почетокот, кога ќе ги откријат своите раце, бебињата подеднакво ги користат. Повеќето деца ја покажуваат доминантната рака помеѓу втората и третата година. Некои деца ќе покажат знаци на доминација веќе на 15 месеци, а кај некои деца нема да можеме да ја препознаеме доминантната рака до петтата или шестата година, кога почнуваат првите обиди за пишување.
Доминацијата на рацете не е свесен избор
Дали вашето дете ќе биде левак или деснак, ќе можете да насетите по тоа со која рака главно ги извршува секојдневните задачи како што се собирање играчки или хранење.
Може да забележите и еден од знаците во игрите со преправање, како што е готвењето. Ако детето го меша замислениот ручек спротивно од стрелките на часовникот, веројатно е дека ќе биде левак.
Најверојатно ќе стане доминантна раката во која детето ја држи боичката додека црта или онаа со која ја фаќа топката кога ќе му ја фрлите.
Некои родители сè уште се потпираат на застареното верување дека левораките деца треба да се коригираат за да станат деснаци, но не треба да го правите тоа. Доминантната рака не е прашање на одлука и противење на природните поставки, кај детето може да предизвика само фрустрација и недостаток на самодоверба.
