Жените кои страдаат од тешки утрински мачнини за време на бременоста, таканаречена хиперемезис гравидарум, имаат поголеми шанси да родат девојчиња. Истражувачите проучувале дури 1,7 милиони бремености за да дојдат до овој заклучок. Нивната анализа ја поврзала хиперемезата гравидарум со мали шанси да имаат син. Не е јасно зошто е тоа така, но едно објаснување е дека машките бебиња се почувствителни во матката и помалку можат да ги издржат тешките девет месеци.
Хиперемезис гравидарум (повраќање во бременост) е многу потешка состојба од „нормалните“ утрински мачнини и погодува една од сто бремени жени. Идните мајки повраќаат до 50 пати на ден, дехидрираат, губат до 10 проценти од својата тежина, а во некои случаи дури доаѓа и до спонтан абортус.
Жените под стрес почесто раѓаат девојчиња
Општо земено, малку повеќе се раѓаат момчиња отколку девојчиња. Меѓутоа, 56 отсто од бебињата во Шведска чии мајки страдале од оваа состојба биле девојчиња, објави New Scientist. Истражувачите исто така потврдиле дека жените што ги следеле имале и повеќе спонтани абортуси. Научниците од Универзитетот Колумбија во Њујорк велат дека едно од објаснувањата е дека е поголема веројатноста за спонтан абортус кај машките бебиња. Друга е дека женските бебиња едноставно почесто предизвикаат силни мачнини за време на бременоста.
Претходни истражувања веќе покажаа дека жените кои се под стрес и имаат проблеми дома, на работа или во љубовниот живот пред да забременат, почесто раѓаат девојчиња.
