Дали некогаш сте сретнале поупорно суштество од дете кое навистина сака нешто? Нема попосветено и порешително суштество на земјата од петгодишно дете кое решило да слушне „Да“ наместо „Не“.
За родителите тоа значи бескрајно убедување и изнесување аргументи на често најнесоодветните места (во продавница, на игралиште, на гости…). Децата како да чувствуваат дека тогаш сме особено ранливи и дека тие имаат најголеми шанси сепак да го истераат нивното.
Затоа е важно да се прекинат преговорите пред да излезат од контрола. Во спротивно, може да се случи детето да прашува повторно и повторно и повторно. За секој случај, ако можеби сте се предомислиле. Тоа не значи дека треба само да го погледнете за да му разјасните се, бидејќи тогаш тоа само значи дека сте го исплашиле. И дефинитивно не го сакате тоа. Па, како, тогаш, да се стави крај на молењето?
Зошто децата молат?
За да прекинете постојаното поставување на истото прашање, прво мора да го разберете проблемот. Пред се, мора да знаете дека „приговарањето“ е научен модел на однесување кај децата. И ако еднаш, во момент на слабост, сте се согласиле да исполните барање што на почетокот не сте сакале да го слушнете (и со реченицата „Не ми се верува колку си напорен/на еве ти“), детето сфатило – досаѓањето функционира!
А како тоа да се поправи?
Како што детето може да научи какво било однесување, исто така може да се одучи од него, со малку труд. Лин Лот, коавтор на бројни книги за позитивна дисциплина, ни го носи решението во една од нејзините книги. И тоа е решение кое дава резултати и за двегодишните деца и за тинејџерите.
А бара од вас да изговорите четири едноставни зборови: „Ти праша, јас одговорив.“!
Концептот е многу едноставен. Но, не и примената на самиот почеток. Подоцна е многу полесно.
Значи, кога седумгодишната Надја ќе побара да добие сладолед после ручек, а вие ќе речете дека не може затоа што веќе јадела еден, има големи шанси да следи едно „ама, те молам“, потоа уште едно, па уште едно… Чисто да ви биде јасно дека таа навистина го сака тој сладолед.
Наместо безброј пати да повторувате дека не може да добие сладолед и да објаснувате зошто секој пат, доволно е да го направите тоа еднаш, а следниот пат едноставно кажете: „Ти праша, јас одговорив“.
