Љубовта, грижата и поддршката на бабите и дедовците благотворно делуваат на внуците. За тоа сведочат бројни истражувања, а подолу наведуваме три причини зошто е добро децата да поминуваат повеќе време со своите баби и дедовци.
Се намалува ризикот од депресија
Емоционалната блискост на бабите и дедовците со нивните внуци го намалува ризикот од депресија кај децата. Во студија, објавена во списанието Gerontology, учествувале 356 внуци и 374 баби и дедовци. Научниците од Бостонскиот колеџ ги анализирале податоците што ги собирале 19 години и откриле дека ризикот од депресија се намалува и кај постарите и кај помладите генерации.
Се зголемува чувството на стабилност и сигурност
Бабите и дедовците им влеваат на внуците чувство на стабилност и емоционална сигурност. Во трауматични ситуации или за време на семејни кавги, бабите и дедовците често се поддршка на внуците.
Истражување на Оксфорд покажало дека блиската врска на внуците и повозрасните генерации им помага на децата да се справат со трауматични случувања во животот, како што се малтретирање во училиште или развод на родителите.
Истражување предводено од професорката Ен Бјукенан опфатило повеќе од 1.500 деца и покажало дека оние кои имаат блиски односи со своите баби и дедовци имаат помалку емоционални тешкотии и проблеми во однесувањето. Покрај тоа, таквите деца имаат поразвиено чувство за самосвест, што им олеснува да ги надминат тешкотиите.
Им ја олеснува работата на родителите
Родителите понекогаш немаат доволно време да си играат и да разговараат со своите деца. Бабите и дедовците можат да ги заменат родителите, особено во ситуации кога на децата им е потребна игра и забава. Освен тоа, бабите и дедовците не се толку строги, па има поголеми шанси внуците да им се доверат.
Сето тоа ја подобрува атмосферата во семејството бидејќи и родителите се посмирени кога знаат дека нивните деца се згрижени и безбедни додека се отсутни.
