Луѓето кои имаат две деца имаат поголема веројатност да доживеат 76 години, сугерира ново истражување. Истражувачите од Универзитетот во Мичиген ги прегледале генетските и здравствените информации на 276.000 луѓе кои живеат во Велика Британија и откриле дека раѓањето деца е поврзано со подолг живот.
„Релативно е јасно дека имањето деца е покорисно за долговечноста отколку воопшто немањето деца. Ја измеривме веројатноста да се живее до 76 години. Оние со деца имаа пет до десет процентни поени предност во однос на оние без деца“, рече еден од авторите на студијата, професорот Џианџи Џанг.
Професорот Џанг вели дека е идеално да се има две деца. „Две деца одговараат на најдолг животен век. Имањето помалку или повеќе деца го намалува животниот век“, истакна тој.
Претходните студии покажаа дека луѓето со деца имаат повеќе социјални интеракции, како што се интеракции со други родители и наставници, а се знае дека поголемиот социјален контакт е поврзан и со подолг живот.
„Можно е родителите на две деца да постигнат добар баланс помеѓу добрата количина на социјална интеракција и не преголемиот економски или физички товар“, додаде Џанг.
Овие наоди се објавени во списанието „Science Advances“.
