Децата често се жалат на болка во грлото, а родителите веднаш се прашуваат: дали станува збор за ангина? Иако ова е една од најчестите бактеријски инфекции кај децата, не секое црвено грло значи дека детето треба да прима антибиотска терапија. Болката може да биде предизвикана и од вирусни инфекции, алергии или сув воздух, а симптомите варираат според возраста и индивидуалната реакција на организмот. Покачена телесна температура, малаксалост и проблеми со апетитот понекогаш се првите знаци кои ги забележуваат родителите. Препознавањето на ангината е важно за правилно лекување и избегнување на компликации, но тоа не треба да предизвикува паника. Со првиот преглед кај педијатар, родителите можат да добијат јасни насоки дали е потребна терапија или само набљудување. Во текстот што следи, ќе разгледаме како се развива ангината, кои се најчестите причинители, како се пренесува, кои се симптомите, и кога е време за брис и почеток на третман. Ова се информации кои секој родител треба да ги знае за да ја разликува обичната болка во грлото од вистинската бактеријска инфекција и да делува навремено.
Први знаци на ангина
Болка во грлото и покачена телесна температура се најчестиот прв знак на ангина. Поголемите деца најчесто чувствуваат прво „гребење“, а потоа вистинска болка во грлото. Кај помалите деца, пак, покачената температура често е првиот знак дека нешто не е во ред.
Ако не се почне со терапија навремено, детето постепено ја губи енергијата, станува нервозно, бледее и се појавува малаксалост. Некои деца, особено помалите, може да повраќаат, а апетитот значително се намалува. Причината е токсин кој бактеријата го создава и кој се шири низ организмот.
Причини за појава на ангина
Ангината претставува гнојно воспаление на грлото, најчесто на крајниците, а најчестиот причинител се стрептококи. Иако и други бактерии како Hemophilus influenzae и Moraxella можат да предизвикаат слични симптоми, бета хемолитичната стрептокока е најчеста. Исто така, стрептококата Pneumoniae може да го нападне грлото и крајниците.
Како се пренесува ангината?
Најчесто преку контакт со заболено дете. Капкови од кашлање и кивање, заеднички прибор за јадење или чаши, како и валкани раце, се лесен пат за ширење на бактеријата, особено во колективи како градинки и училишта.
Дијагноза и брис
Лекарот при преглед лесно може да го забележи воспаленото ждрело, зголемените крајници со гнојни чепови, петехии на непцата и зголемени лимфни јазли на вратот. Во сомнителни случаи, брис од грлото ја потврдува дијагнозата.
Сепак, кога знаците на ангина се очигледни, не е потребно да се чека резултатот од брисот за да се започне терапија. Навремено започнување на третманот го намалува ризикот од компликации и понатамошно ширење на инфекцијата.
Дали секое црвено грло значи ангина?
Не, велат педијатрите. Многу инфекции на грлото можат да бидат вирусни или предизвикани од други бактерии, па не треба секое црвено грло да се третира со антибиотици. Ако детето е без висока температура, добро расположено и со минимални симптоми, почекувањето на резултатите од брисот е безбедно. Најголема опасност е самоиницијативното давање антибиотици, што може да доведе до резистенција на бактериите.
